Hesperian Health Guides
ການສອນພາສາມືໃຫ້ແກ່ພໍ່ແມ່ຂອງເດັກຫູໜວກ
ຂໍ້ມູນສຸຂະພາບ > ການຊ່ວຍເຫຼືອເດັກນ້ອຍຫູໜອກ > ບົດທີ 8: ການຮຽນຮູ້ວິທີນຳໃຊ້ພາສາມື > ການສອນພາສາມືໃຫ້ແກ່ພໍ່ແມ່ຂອງເດັກຫູໜວກ
ນີ້ແມ່ນບົດເລື່ອງກ່ຽວກັບສະມາຄົມຂອງແມ່ ຂອງເດັກຫູໜວກຊາວອິນເດຍກຸ່ມໜຶ່ງ ທີ່ອາໄສຢູ່ປະ ເທດອັງກິດ. ຜູ້ຊຶ່ງຮຽນພາສາມືຂອງອັງກິດ ຈາກຄູສອນຫູໜວກ. ກ່ອນໜ້າການຮຽນພາສາມື, ທັງເດັກນ້ອຍຫູ ໜວກ ແລະ ພໍ່ແມ່ຂອງພວກເຂົາແມ່ນມີບັນຫາໃນການສື່ສານ ເພາະວ່າ ມັນຫຍຸ້ງຍາກສຳລັບພວກເຂົາໃນການເຂົ້າໃຈຊຶ່ງກັນ ແລະ ກັນ. ເຊິ່ງການຮຽນພາສາມືໄດ້ປ່ຽນແປງສິ່ງເຫຼົ່ານີ້.
ການໝູນໃຊ້ພາສາມືເພື່ອຜ່ານຜ່າອຸປະສັກທາງພາສາ
“ລີຊ້າ” ແມ່ນຍິງຊາວອັງກິດເຊິ່ງຫູໜວກຕັ້ງແຕ່ກຳເນີດ. ຫຼັງຈາກສຳເລັດການສຶກສາຈາກໂຮງຮຽນສ້າງຄູ. ລາວໄດ້ເຮັດວຽກເປັນຄູສອນເດັກຫູໜວກ. ວຽກຂອງນາງ ແມ່ນການຊ່ວຍເຫຼືອໃຫ້ແມ່ຂອງບັນດາເດັກຫູໜວກຮຽນຮູ້ພາສາມື. ໃນບັນດາກຸ່ມທີ່ ລີຊ້າ ສອນນັ້ນ ແມ່ນກຸ່ມຂອງແມ່ຍິງຊາວອິນເດຍ ທີ່ບໍ່ສາມາດເວົ້າພາສາອັງກິດໄດ້. ທຳອິດແມ່ນຫຍຸ້ງຍາກສຳລັບ “ລີຊ້າ” ແລະ ກຸ່ມແມ່ຂອງເດັກຫູໜວກດ່ັງກ່າວທີ່ຈະສື່ສານນຳກັນ. ລີຊ້າ ໃຊ້ພາສາມືຂອງອັງກິດ ແລະ ໃຫ້ອາຈານອີກຄົນໜຶ່ງແປເປັນພາສາເວົ້າຂອງອັງກິດ. ຈາກນັ້ນຈຶ່ງໃຫ້ແມ່ຍິງອີກຄົນໜຶ່ງແປຈາກພາສາອັງກິດ ເປັນພາສາ “ປັນຈາບີ” (ພາສາໜຶ່ງໃນປະເທດອິນເດຍ) ເຊິ່ງເປັນພາສາທີ່ກຸ່ມແມ່ຂອງເດັກຫູໜວກ ກຸ່ມນີ້ສາມາດເຂົ້າໃຈໄດ້ທຸກຄົນ.
ກຸ່ມແມ່ຂອງເດັກຫູໜວກ ເລີ່ມຕົ້ນຈາກການຮຽນສັນຍະລັກທີ່ກ່ຽວກັບເຮືອນ. ພ້ອມນັ້ນກໍ່ຮຽນສັນຍະ ລັກຕ່າງໆ ທີ່ເດັກນ້ອຍຮຽນຢູ່ໃນຫ້ອງຮຽນ ເຊິ່ງຊ່ວຍໃຫ້ພໍ່ແມ່ເຂົ້າໃຈ ແລະ ສາມາດສື່ສານກັບເດັກນ້ອຍໄດ້ເມື່ອຢູ່ບ້ານ.
ຫຼັງຈາກນັ້ນ, ຈິ່ງມີອາຈານຜູ້ຊາຍເຂົ້າມາຮ່ວມໃນ ກຸ່ມຂອງ ລີຊີ, ອາຈານຄົນນີ້ສອນບັນດາພໍ່ ແລະ ອ້າຍ ຂອງເດັກຫູໜວກສຳລັບກຸ່ມຜູ້ຊາຍ. ໃນທັງສອງກຸ່ມນີ້, ພໍ່ແມ່ທີ່ມີເດັກຫູໜວກທີ່ໃຫຍ່ແລ້ວ ກັບຜູ້ທີ່ຍັງມີລູກຫູໜວກທີ່ຍັງນ້ອຍໄດ້ແລກປ່ຽນປະສົບການນຳກັນ. ນີ້ເປັນໂອກາດດີໃຫ້ພວກເຂົາໝູນໃຊ້ທັກສະທາງພາສາມືໃໝ່ໆ ເພື່ອສົນທະນາກ່ຽວກັບສິ່ງຕ່າງໆ ທີ່ມີຄວາມສຳຄັນສຳລັບພວກເຂົາ.
ການໄດ້ເຫັນ ລີຊ້າ ເຮັດວຽກ ແລະ ກໍ່ສິດສອນ, ເຮັດໃຫ້ບັນດາພໍ່ແມ່ເຫຼົ່ານັ້ນເຫັນໂອກາດທີ່ລູກຂອງຕົນສາມາດກາຍເປັນອາຈານ, ຫາລ້ຽງຊີບ ແລະ ໄດ້ຮັບຄວາມເຄົາລົບນັບຖືຈາກຄົນອື່ນໆ. ຫຼາຍຄອບຄົວໃນຊຸມຊົນດັ່ງກ່າວ ຮຽນຮູ້ຫຼາຍສິ່ງຫຼາຍຢ່າງກ່ຽວກັບຄົນຫູໜວກ ໄປພ້ອມກັບການຮຽນຮູ້ວິທີສື່ສານກັບຄົນຫູໜວກໃນເວລາດຽວກັນ.
ຄຳແນະນຳສຳລັບຜູ້ໃຫຍ່ໃນການຮຽນພາສາມື
ສຳລັບພາສາມື ຈຸດໜັກແມ່ນຂຶ້ນກັບວິທີທີ່ທ່ານສະແດງອອກ ໂດຍຜ່ານທຸກພາກສ່ວນຂອງຮ່າງ ກາຍ. ວິທີທີ່ທ່ານຢືນ, ການສະແດງອອກທາງສີໜ້າເພື່ອສື່ສານ ແລະ ການສະແດງອອກໂດຍຜ່ານມື.
ຄົນຫູໜວກກໍ່ສັງເກດໃບໜ້າຂອງຄູ່ສົນທະນາທີ່ ພວກເຂົາກຳລັງສື່ສານນຳ, ບໍ່ແມ່ນພຽງແຕ່ສັງເກດມືເທົ່ານັ້ນ, ກໍ່ຄືກັນກັບຄົນທີ່ໄດ້ຍິນປົກກະຕິ ສື່ສານນຳກັນກໍ່ສັງເກດເບິ່ງໃບໜ້າໄປພ້ອມໆ ກັບການຟັງ.
- ສະແດງທ່າທາງທີ່ທ່ານຕ້ອງການເວົ້າ, ບໍ່ຕ້ອງກັງວົນວ່າ ທ່ານຈະເຮັດຜິດ ຫຼື ເປັນຄືຄົນໂງ່.
- ໝູນໃຊ້ທຸກສິ່ງທຸກຢ່າງ ເພື່ອຊ່ວຍໃນການສື່ສານເຊັ່ນ: ທ່າທີ, ການສະແດງອອກທາງສີໜ້າ, ການເຄື່ອນເໜັງຂອງຮ່າງກາຍ, ການໃຊ້ນິ້ວມືສະກົດເປັນຕົວອັກສອນ (ການສະກົດຕົວອັກສອນໂດຍໃຊ້ສັນຍະລັກສຳລັບຕົວອັກສອນແຕ່ລະຕົວ). ລອງສື່ສານຄວາມຄິດເຫັນ ຫຼື ປະໂຫຍດທີ່ງ່າຍດາຍ ໂດຍບໍ່ໝູນໃຊ້ບັນດາສັນຍະລັກທາງການທີ່ເຄີຍໃຊ້, ໃຫ້ລອງໃຊ້ທ່າທາງການສະແດງສີໜ້າ ແລະການຊີ້ບອກແທນ. ເພາະໃນກໍລະນີທີ່ທ່ານບໍ່ຮູ້ ຫຼື ລືມສັນຍະລັກທີ່ເຄີຍໃຊ້, ທ່ານກໍ່ຍັງສາມາດສື່ສານກັບຄົນຫູໜວກໄດ້ໂດຍໃຊ້ວິທີນີ້.
- ຄົນແຕ່ລະຄົນຮຽນຮູ້ພາສາໂດຍວິທີທາງທີ່ແຕກຕ່າງກັນ ແລະ ໃນບາດກ້າວທີ່ບໍ່ເຄີຍ. ຈົ່ງຮຽນໃຫ້ຫຼາຍເທົ່າທີ່ຈະຫຼາຍໄດ້. ບໍ່ຄວນກັງວົນວ່າ ມັນເປັນສິ່ງທີ່ຄົນອື່ນໄດ້ຮຽນ ຫຼື ບໍ່ເຄີຍຮຽນມາກ່ອນເພາະວ່າ ເປົ້າໝາຍຫຼັກຂອງທ່ານແມ່ນເພື່ອຊ່ວຍລູກຂອງທ່ານ ບໍ່ແມ່ນເພື່ອແຂ່ງຂັນກັບຄົນອື່ນ.
- ເພື່ອຮຽນພາສາມືແທ້ໆ, ຈົ່ງໃຊ້ພາສາມືກັບຄົນຫູໜວກທີ່ໃຊ້ພາສາດັ່ງກ່າວ.
ການຮຽນຮູ້ພາສາມືອາດຈະບໍ່ແມ່ນເລື່ອງງ່າຍ. ແຕ່ຈົ່ງຈື່ໄວ້ວ່າ, ສິ່ງສຳຄັນແມ່ນເພື່ອໃຫ້ລູກຂອງທ່ານມີພາສາທີ່ພວກທ່ານສາມາດສື່ສານນຳກັນໄດ້. ສືບຕໍ່ຝຶກຝົນມັນເລື້ອຍໆ ເພາະວ່າ ຖ້າບໍ່ໝູນໃຊ້ມັນ ທ່ານກໍ່ຈະລືມມັນໄປເໝືອນກັບພາສາອື່ນໆ ທີ່ທ່ານໄດ້ຮຽນມາ.