Hesperian Health Guides
ທຳຄວາມເຂົ້າໃຈກັບຄວາມຮູ້ສຶກຂອງທ່ານ
ຂໍ້ມູນສຸຂະພາບ > ການຊ່ວຍເຫຼືອເດັກນ້ອຍຫູໜອກ > ບົດທີ 14: ການສະໜັບສະໜູນສຳລັບພໍ່ແມ່ ແລະ ຜູ້ດູແລເດັກ > ທຳຄວາມເຂົ້າໃຈກັບຄວາມຮູ້ສຶກຂອງທ່ານ
ພໍ່ແມ່ ສະມາຊິກຄົນອື່ນໆໃນຄອບຄົວ ແລະ ຜູ້ດູແລເດັກຈະສະແດງຄວາມຮູ້ສຶກທີ່ພວກເຂົາມີອອກມາໃນຫຼາຍໆແບບແຕກຕ່າງກັນ. ເປັນສິ່ງທີ່ດີທີ່ສຸດທີ່ຈະປ່ອຍໃຫ້ພວກເຂົາຮູ້ສຶກຕາມແບບຂອງພວກເຂົາ, ໂດຍປາສະຈາກການຕັດສິນວ່າສິ່ງນັ້ນຜິດ ຫຼື ຖືກ.
ບັນດາຄວາມຮູ້ສຶກຕ່າງໆ ເຊັ່ນ: ຄວາມກັງວົນ, ຄວາມໂດດດ່ຽວ ຫຼື ຄວາມຢ້ານກົວ ຈະຄ່ອຍຫຼຸດ ຜ່ອນລົງເມື່ອເວລາຜ່ານໄປ ທ່ານຈະຮັບຮູ້ວ່າເດັກທີ່ມີບັນຫາ ໃນການໄດ້ຍິນກໍ່ມີຄວາມຕ້ອງການຄວາມຮັກ, ຄວາມເມດຕາ, ມີລະບຽບວິໄນ ແລະ ຮຽນຮູ້ເໝືອນກັບເດັກນ້ອຍຄົນອື່ນໆ.
ຄວາມຮູ້ສຶກເຫຼົ່ານີ້ຈະກັບຄືນມາຫາທ່ານອີກເທື່ອໜຶ່ງໃນໄລຍະສຳຄັນ (ຫົວລ້ຽວຫົວຕໍ່) ຂອງຊີວິດເດັກເຊັ່ນ: ເມ່ືອເຂົາເລີ່ມເຂົ້າໂຮງຮຽນ ເຊິ່ງສິ່ງນີ້ບໍ່ໄດ້ໝາຍຄວາມວ່າມີສິ່ງຜິດປົກກະຕິ, ແຕ່ມັນໝາຍຄວາມວ່າທ່ານກຳລັງຜ່ານໄລຍະຂອງການຍອມຮັບເອົາຄວາມຫູໜວກຂອງລາວ.
ຄວາມຮູ້ສຶກເຫຼົ່ານີ້ຊ່ວຍໃຫ້ທ່ານຕ້ອງເຮັດສິ່ງໃດສິ່ງໜຶ່ງເພື່ອເຮັດໃຫ້ຊີວິດຂອງລູກດີຂຶ້ນຍົກຕົວຢ່າງຄວາມ ຮູ້ສຶກໂດດດ່ຽວ. ອາດກະຕຸ້ນໃຫ້ທ່ານເຂົ້າຫາຜູ້ໃຫຍ່ທີ່ຫູໜວກໃນຊຸມຊົນ ຫຼື ບັນດາຄອບຄົວທີ່ມີລູກຫູໜວກ. ຄວາມໃຈຮ້າຍອາດຊ່ວຍໃຫ້ພະລັງແກ່ທ່ານໃນການລວມກຸ່ມກັບບັນດາພໍ່ແມ່ ເພື່ອຮ້ອງຂໍໃຫ້ລັດຖະບານສະໜອງການສຶກສາໃຫ້ແກ່ເດັກຫູໜວກ.
ເມື່ອທ່ານສາມາດຍອມຮັບວ່າລູກຂອງທ່ານມີບັນຫາໃນການໄດ້ຍິນ, ທ່ານກໍ່ຈະເລີ່ມຮູ້ສຶກຮັກເດັກໃນສິ່ງທີ່ເຂົາເປັນ ແລະ ກໍ່ເໝືອນກັບເດັກທົ່ວໄປ, ເຂົາກໍ່ຈະໃຫ້ຄວາມຊ່ວຍເຫຼືອຄວາມພໍໃຈ ແລະ ຄວາມລ່າເລີງໃຫ້ແກ່ທ່ານ.
