Hesperian Health Guides
ບົດທີ 10: ທັກສະທາງສັງຄົມ
ຂໍ້ມູນສຸຂະພາບ > ການຊ່ວຍເຫຼືອເດັກນ້ອຍຫູໜອກ > ບົດທີ 10: ທັກສະທາງສັງຄົມ
ບຸກຄົນໃດຫາກສາມາດເຂົ້າກັບຄົນອ້ອມຂ້າງໄດ້, ໝາຍຄວາມວ່າບຸກຄົນນັ້ນມີ “ທັກສະທາງສັງຄົມ” ທີ່ດີ. ຄົນເຮົາພັດທະນາທັກສະທາງສັງຄົມ ເມື່ອພວກເຮົາມີການພົວພັນເຊິ່ງກັນ ແລະ ກັນ ແລະ ເມື່ອຄົນເຮົາ ໃຈໃສ່ຄວາມຮູ້ສຶກຂອງຄົນອື່ນ.
ການມີທັກສະທາງດ້ານສັງຄົມທີ່ດີເປັນສິ່ງສຳຄັນສຳລັບທຸກໆຄົນ. ເພື່ອຢາກເປັນສ່ວນໜຶ່ງຂອງກຸ່ມຄົນ ບໍ່ວ່າຈະເປັນໃນຄອບຄົວ, ກຸ່ມເພື່ອນຝູງ ຫຼື ຢູ່ໃນໂຮງຮຽນນັ້ນ ມັນຈຳເປັນທີ່ພວກເຮົາຕ້ອງມີທັກສະທາງສັງຄົມ.
ທັກສະທາງສັງຄົມບໍ່ແມ່ນພຽງແຕ່ການມີມາລະຍາດທີ່ດີ. ການມີທັກສະທາງສັງຄົມທີ່ດີເຮັດໃຫ້ຄົນເຮົາ:
- ໃຫ້ ແລະ ຮັບຄວາມສົນໃຈ, ຄວາມຮັກ ຫຼື ການຊ່ວຍເຫຼືອ.
- ສະແດງອອກເຖິງຄວາມຕ້ອງການ, ຄວາມຮູ້ສຶກ ແລະ ສິດທິໃນແນວທາງທີ່ເປັນທີ່ຍອມຮັບຈາກຄົນອື່ນ.
- ສື່ສານກັບຄົນອື່ນຢ່າງມີປະສິດທິພາບ.
ມັນເປັນສ່ິງສຳຄັນທີ່ເດັກນ້ອຍຫູໜວກ ຫຼື ເດັກທີ່ມີບັນຫາໃນການໄດ້ຍິນ ຕ້ອງພັດທະນາທັກສະທາງສັງ ຄົມ. ການທີ່ພວກເຂົາສາມາດເຂົ້າກັບຄົນອື່ນໆໄດ້ຊ່ວຍໃຫ້ເດັກບໍ່ຖືກໂດດດ່ຽວຈາກຄົນອ້ອມຂ້າງ.
ກໍ່ເໝືອນກັບເດັກທີ່ໄດ້ຍິນປົກກະຕິ, ເດັກຫູໜວກ ຕ້ອງສ້າງທັກສະທາງສັງຄົມໂດຍການສັງເກດ ແລະ ການປະຕິສຳພັນກັບຜູ້ຄົນທີ່ຢູ່ອ້ອມຂ້າງພວກເຂົາ. ສິ່ງນີ້ຈະຊ່ວຍໃຫ້ເດັກຮູ້ໃນສິ່ງທີ່ຄວນກະທຳເຊັ່ນ: ການປະຕິບັດຕົນຕໍ່ຜູ້ອາວຸໂສ, ການຂໍອະນຸຍາດເພື່ອໃຊ້ສິ່ງຂອງ ຂອງຄົນອື່ນ ຫຼື ການລໍ ຖ້າຈົນຮອດຜຽນຂອງຕົນ ໃນການເຂົ້າຮ່ວມກິດຈະກຳໃດໜຶ່ງ.