Hesperian Health Guides
ບົດທີ 6: ທັກສະໃນການຟັງ
ຂໍ້ມູນສຸຂະພາບ > ການຊ່ວຍເຫຼືອເດັກນ້ອຍຫູໜອກ > ບົດທີ 6: ທັກສະໃນການຟັງ
ໂດຍໄດ້ຮັບການຊ່ວຍເຫຼືອ, ເດັກຜູ້ຊຶ່ງມີບັນຫາໃນການໄດ້ຍິນ ສາມາດຮຽນຮູ້ວິທີໃນການຕັ້ງໃຈຟັງບັນດາສຽງທີ່ພວກເຂົາມີຄວາມສາມາດໄດ້ຍິນ. ຄວາມເຂົ້າໃຈກ່ຽວກັບສຽງຊ່ວຍໃຫ້ເດັກຮຽນຮູ້ໂລກອ້ອມຂ້າງ. ຊ່ວຍໃຫ້ພວກເຂົາສາມາດໃຊ້ຄວາມອາດສາມາດໃນການໄດ້ຍິນໃຫ້ໄດ້ດີຂຶ້ນ, ສາມາດປ້ອງກັນຕົນເອງ, ດຳລົງຊີວິດຢ່າງປອດໄພ ແລະ ຊ່ວຍເຫຼືອຕົນເອງໄດ້.
ເດັກຈຳນວນໜຶ່ງຍັງສາມາດໄດ້ຍິນໜ້ອຍໜຶ່ງເມືື່ອຄົນອື່ນລົມກັບພວກເຂົາ. ເດັກຫຼາຍຄົນທີ່ມີບັນຫາໃນການໄດ້ຍິນ ບໍ່ສາມາດໄດ້ຍິນສຽງຄ່ອຍ ແຕ່ພວກເຂົາຜັດສາມາດໄດ້ຍິນສຽງທີ່ດັງ, ເດັກຈຳນວນໜຶ່ງສາມາດໄດ້ຍິນສຽງທີ່ມີໂທນສຽງຕ່ຳ ເຊັ່ນ: ສຽງພາຍຸ, ແຕ່ກັບບໍ່ສາມາດໄດ້ຍິນສຽງທີ່ມີໂທນສຽງສູງ ເຊັ່ນ: ສຽງໝາກຫວີດ. ແຕ່ເນື່ອງຈາກ ພວກເຂົາບໍ່ເຂົ້າໃຈຄວາມໝາຍຂອງສຽງ, ພວກເຂົາຈິ່ງບໍ່ໄດ້ໃຫ້ຄວາມສົນໃຈແກ່ສຽງເຫຼົ່ານັ້ນ.
ສະນັ້ນ ຖ້າເດັກນ້ອຍເຫຼົ່ານີ້ ໄດ້ມີການຝຶກຊ້ອມການຟັງ, ມັນຈະຊ່ວຍໃຫ້ພວກເຂົາພັດທະນາ ແລະ ໝູນໃຊ້ຄວາມສາມາດໃນການໄດ້ຍິນທີ່ພວກເຂົາຍັງພໍມີ.
ເພື່ອເຮັດໃຫ້ເດັກນ້ອຍສາມາດໄດ້ຍິນໄດ້ດີອຂຶ້ນ ເດັກນ້ອຍຄວນ:
- ສັງເກດສຽງອ້ອມຂ້າງ ແລະ ສຽງປາກເວົ້າ.
- ຊອກຫາແຫຼ່ງທີ່ມີຂອງສຽງອ້ອມຂ້າງ ຫຼື ສຽງປາກເວົ້າດ່ັງກ່າວ.
- ຈື່ຈຳໃຫ້ໄດ້ວ່າແມ່ນສຽງຫຍັງ.
- ບອກຄວາມແຕກຕ່າງຂອງສຽງເຫຼົ່ານັ້ນ.
ໃນພາກນີ້ ຈະປະກອບມີບັນດາກິດຈະກຳ ທີ່ຈະຊ່ວຍກະຕຸກຊຸກຍູ້ໃຫ້ເດັກທີ່ມີບັນຫາໃນການໄດ້ຍິນສັງເກດ, ຟັງ ແລະ ຮູ້ສຶກສາຄວາມສັ່ນສະເທືອນຂອງສຽງຕ່າງໆ. ກິດຈະກຳດັ່ງກ່າວຈະຊ່ວຍໃຫ້ເຂົາເຈົ້າຮຽນຮູ້ກ່ຽວກັບສຽງ, ພ້ອມນັ້ນ ກໍ່ຈະຊ່ວຍໃຫ້ທ່ານຮູ້ໄດ້ວ່າ ເດັກນ້ອຍຜູ້ນັ້ນ ພໍມີຄວາມສາມາດໃນການໄດ້ຍິນຢູ້ບໍ ແລະ ແມ່ນສຽງປະເພດໃດທີ່ລາວສາມາດໄດ້ຍິນ. ເຊິ່ງບັນດາຂ້ໍມູນເຫຼົ່ານີ້ ຈະຊ່ວຍໃຫ້ທ່ານສາມາດຮູ້ໄດ້ວ່າ ເດັກນ້ອຍຜູ້ນັ້ນ ຄວນຮຽນພາສາເວົ້າ ຫຼື ພາສາມື ຈຶ່ງຈະມີຄວາມເໝາະສົມກວ່າກັນ.
ໃນຂະນະທີ່ເຮັດກິດຈະກຳຢູ່ໃນບົດນີ້, ທ່ານຄວນສັງເກດບັນດາສິ່ງທີ່ສະແດງໃຫ້ຮູ້ວ່າ ເດັກຜູ້ນັ້ນ ກຳລັງຟັງສຽງ ເດັກນ້ອຍອາດສະແດງໃຫ້ຮູ້ວ່າ ລາວກຳລັງຟັງໂດຍການຫັນໜ້າເບິ່ງ, ປ່ຽນສີໜ້າ, ເຄື່ອນຍ້າຍຮ່າງກາຍ, ຢືນຈຶ້ງຢູ່, ກະພິບຕາ ຫຼື ອາດຈະຮ້ອງເປັນສຽງອອກມາ.
ຍ້ອງຍໍເດັກ ຖ້າລາວມີການຕອບສະໜອງຕໍ່ສຽງ ຫຼື ຄຳເວົ້າ. ຖ້າລາວບໍ່ມີການຕອບສະໜອງໃຫ້ເຮັດສຽງດັ່ງກ່າວອີກເທື່ອໜຶ່ງ ຖ້າທ່ານສາມາດເຮັດໄດ້. ແທນທີ່ຈະເຮັດໃຫ້ສຽງນັ້ນດັງຂຶ້ນ ໃຫ້ທ່ານພະຍາຍາມເຮັດໃຫ້ສຽງດັ່ງກ່າວ ຫຍັບມໍ່ເຂົ້າຫາລາວ. ທ່ານຄວນມີຄວາມອົດທົນ ເພາະວ່າໄລຍະເວລາທີ່ເດັກນ້ອຍ ຈະພັດທະນາທັກສະໃນການຟັງແມ່ນກິນເວລາດົນ.
ໃນໄລຍະທີ່ທ່ານຝຶກຊ້ອມການຟັງໃຫ້ເດັກນັ້ນ. ສຽງຈາກສິ່ງແວດລ້ອມອ້ອມຂ້າງທີ່ດັງສະໝ່ຳສະເໝີ ອາດເຮັດໃຫ້ເດັກບໍ່ສາມາດໄດ້ຍິນສຽງຂອງທ່ານ ຫຼື ບໍ່ສາມາດແຍກສຽງທີ່ທ່ານຕ້ອງການໃຫ້ລາວໄດ້ຍິນໄດ້. ຖ້າເດັກຄົນນັ້ນຫາກໃຊ້ເຄື່ອງຊ່ວຍຟັງ, ທ່ານຄວນຈື່ໄວ້ວ່າອເຄື່ອງຊ່ວຍຟັງເຮັດໃຫ້ເດັກ ໄດ້ຍິນສຽງຂອງທ່ານດັງຂຶ້ນ ແຕ່ກໍ່ເຮັດໃຫ້ລາວໄດ້ຍິນສຽງສິ່ງຂອງອ້ອມຂ້າງດັງຂຶ້ນໄປນຳເຊັ່ນດຽວກັນ.
