Hesperian Health Guides
ສະຖານທີ່, ບຸກຄົນທ່ີສາມາດໃຫ້ຄວາມຊ່ວຍເຫຼືອແກ່ພໍ່ແມ່ເດັກ
ຂໍ້ມູນສຸຂະພາບ > ການຊ່ວຍເຫຼືອເດັກນ້ອຍຫູໜອກ > ບົດທີ 7: ການເລືອກເຟັ້ນ ແລະ ການຮຽນຮູ້ພາສາ > ສະຖານທີ່, ບຸກຄົນທ່ີສາມາດໃຫ້ຄວາມຊ່ວຍເຫຼືອແກ່ພໍ່ແມ່ເດັກ
ການຮຽນຮູ້ພາສາຂອງເດັກຫູໜວກ ແລະ ເດັກທີ່ມີບັນຫາໃນການໄດ້ຍິນ ແມ່ນຂຶ້ນກັບໂຕຂອງເດັກເອງ, ສະຖານທີ່, ບຸກຄົນທີ່ຕອບສະໜອງຂ້ໍມູນກ່ຽວກັບເດັກຫູໜວກ, ຄອບຄົວ, ຜູ້ດູແລ ແລະ ຊຸມຊົນທີ່ພວກເຂົາອາໄສຢູ່. ຖ້າທັງພໍ່ແມ່ ແລະ ຜູ້ດູແລຊ່ວຍເຫຼືອເຊິ່ງກັນ ແລະ ກັນ ໃນການຊ່ວຍໃຫ້ເດັກຮຽນຮູ້ພາສາຈະເຮັດໃຫ້ການຮຽນມີຜົນດີຂຶ້ນ ແລະ ຍິ່ງຈະດີຂຶ້ນອີກຖ້າຫາກໄດ້ຮັບການສະໜັບສະໜູນຈາກອົງການຈັດຕັ້ງ ຂອງຊຸມຊົນ, ຈາກໂຮງຮຽນສອນຄົນຫູໜວກ ແລະ ຈາກອົງການຈັດຕັ້ງອື່ນໆ.
ສະຖານທີ່, ບຸກຄົນພາຍໃນຊຸມຊົນທີ່ສາມາດໃຫ້ຄວາມຊ່ວຍເຫຼືອປະກອບມີ:
- ກຸ່ມຄົນຫູໜວກທີ່ຢູ່ໃນເຂດທີ່ທ່ານອາໄສ, ສະມາຄົມຄົນຫູໜວກ ຫຼື ບຸກຄົນທີ່ສາມາດຊ່ວຍສອນພາສາມືໃຫ້ເດັກ ແລະ ຄອບຄົວຂອງທ່ານ.
- ໂຄງການຟື້ນຟູຄົນພິການທີ່ຕັ້ງຢູ່ຂົງເຂດຂອງທ່ານ. ກຸ່ມສະມາຄົມພໍ່ແມ່ ແລະ ກຸ່ມອື່ນໆ ທີ່ຕັ້ງຢູ່ໃນຊຸມຊົນ.
- ອາຈານຢູ່ໃນໂຮງຮຽນທ້ອງຖິ່ນດັ່ງກ່າວ, ຄົນຫູໜວກອາວຸໂສ ຫຼື ຄົນອື່ນໆທີ່ມີເຈຕະນາ ຢາກສິດສອນເດັກຫູໜວກ.
- ໂຮງຮຽນທີ່ສາມາດສອນເດັກນ້ອຍຫູໜວກໃນຂົງເຂດທີ່ທ່ານອາໄສຢູ່.
- ປຶ້ມ ແລະ ວິດີໂອ ທີ່ມີຫົວຂ້ໍກ່ຽວກັບຄວາມສຳຄັນຂອງຄົນຫູໜວກ, ປະສົບການຈາກຊີວິດຂອງຄົນຫູໜວກ ແລະ ບົດເລື່ອງກ່ຽວກັບຄົນຫູໜວກທີ່ປະສົບຄວາມສຳເລັດໃນໜ້າທີ່ວຽກງານ.
ການຮຽນໃຊ້ພາສາມືຍັງຊ່ວຍໃຫ້ເດັກນ້ອຍຫູໜວກຮູ້ຈັກກັບຄົນອື່ນໆ ທີ່ຫູໜວກຄືກັນ. ເດັກຈະຮຽນຮູ້ວ່າຄົນຫູໜວກກໍ່ເປັນພາກສ່ວນສຳຄັນຂອງສັງຄົມ.
ຖ້າໃນຊຸມຊົນຂອງທ່ານ ມີຄົນຫູໜວກ ທີ່ເປັນຜູ້ໃຫຍ່ແດ່ແລ້ວ, ຈົ່ງຂໍໃຫ້ລາວຊ່ວຍຫຼິ້ນກັບລູກຂອງທ່ານພ້ອມທັງສອນພາສາມືໃຫ້ທ່ານ ແລະ ລູກພ້ອມ.
ແຕ່ຖ້າຫາກບໍ່ມີຄົນຫູໜວກໃນຊຸມຊົນທີ່ທ່ານອາໄສຢູ່, ກໍ່ໃຫ້ລອງພົວພັນນຳອົງການຄົນຫູໜວກຂອງປະເທດພວກທ່ານ ຫຼື ໂຮງຮຽນສອນຄົນຫູໜວກກໍ່ໄດ້. ລອງຊອກປຶ້ມທີ່ຊ່ວຍໃຫ້ທ່ານຮຽນຮູ້ພາສາມື. ຖ້າຫາກວ່າເປັນໄປບໍ່ໄດ້ ກໍ່ຈົ່ງສືບຕໍ່ໃຊ້ພາສາມື ແລະ ທ່າທາງຂອງທ່ານ ທີ່ປະດິດຂຶ້ນ ແລະ ພະຍາຍາມສ້າງສັນຍະລັກໃໝ່ ດ້ວຍຕົວຂອງທ່ານເອງ.
ສິ່ງສຳຄັນແມ່ນຕ້ອງພະຍາຍາມສື່ສານກັບເດັກຫູໜວກໃຫ້ຫຼາຍເທົ່າທີ່ຈະເຮັດໄດ້. ສຳຄັນໄປກວ່ານັ້ນ ແມ່ນເດັກນ້ອຍຕ້ອງການໃຫ້ທ່ານຮັກພວກເຂົາ, ກະຕຸກຊຸກຍູ້ພວກເຂົາ ແລະ ໃຫ້ທິດທາງແກ່ພວກເຂົາ. ສິ່ງນີ້ຈະເຮັດໃຫ້ພາສາກາຍເປັນພາກສ່ວນໜຶ່ງຂອງຊີິວິດເດັກ.