Hesperian Health Guides
ການວາງແຜນຄອບຄົວ
ຂໍ້ມູນສຸຂະພາບ > ປຶ້ມຢູ່ໄກແພດສະບັບປັບປຸງໃໝ່ > ການວາງແຜນຄອບຄົວ
ບົດນີ້ແມ່ນເວົ້າເຖິງວິທີການປ້ອງກັນການຖືພາ ຫຼືກະເວລາໃນການຖືພາແຕ່ລະຄັ້ງ. ວິທີການທັງໜົດ ທີ່ໄດ້ອະທິບາຍ ຢູ່ໃນບົດນີ້ ເປັນວິທີການທີ່ຜູ້ຄົນທົ່ວໂລກໃຊ້ໄດ້ຢ່າງປອດໄພດີ.
ເນື້ອໃນ
ເປັນຫຍັງຈຶ່ງຕ້ອງມີການວາງແຜນຄອບຄົວ?
ມີຫຼາຍວິທີການທີ່ປອດໄພ, ມີປະສິດທິພາບ ໃນການປ້ອງກັນການຖືພາ, ຫຼື ຊ່ວຍໃຫ້ເຈົ້າເລືອກເວລາ ທີ່ເໝາະສົມ ໃນການ ມີລູກ ແລະ ຈະເອົາລູກຈັກຄົນ. ເຈົ້າສາມາດຂໍຄຳແນະນຳ ກ່ຽວກັບວິທີການວາງແຜນຄອບຄົວ ໄດ້ຈາກບຸກຂະລາກອນ ສາທາລະນະສຸກ ຫຼື ຄຼີນິກ, ເຊິ່ງກໍ່ມີຫຼາຍວິທີການ ລວມທັງແບບທີ່ເສຍຄ່າໃຊ້ຈ່າຍຖືກ ຫຼື ແບບບໍ່ເສຍຄ່າກໍ່ມີ.
ການວາງແຜນຄອບຄົວນີ້ ກໍ່ມີຊື່ເອີ້ນອີກຢ່າງໜຶ່ງວ່າ: ການຄຸມກຳເນີດ. ບໍ່ວ່າເຮົາຈະເອີ້ນມັນວ່າແນວໃດກໍ່ຕາມ, ການວາງ ແຜນຄອບຄົວ ຫຼື ການຄຸມກຳເນີດນີ້ ແມ່ນມີຜົນດີຫຼາຍຢ່າງ ເຊັ່ນ:
- ການເອົາລູກໜ້ອຍຄົນ ແມ່ນມີຜົນດີເຮັດໃຫ້ສຸຂະພາບຮ່າງກາຍ ຂອງຜູ້ເປັນແມ່ແຂງແຮງດີຫຼາຍກວ່າ ການມີລູກຫຼາຍ ຄົນ. ດ້ວຍການນຳໃຊ້ວິທີການວາງແຜນຄອບຄົວນີ້, ເຈົ້າສາມາດຕັດສິນໃຈໄດ້ວ່າ ເມື່ອໃດທີ່ຮ່າງກາຍຂອງເຈົ້າ ມີສຸ ຂະພາບແຂງແຮງດີພ້ອມທີ່ຈະຖືພາໄດ້.
- ການລໍຖ້າເວລາທີ່ເໝາະສົມເພື່ອມີລູກ ແລະ ການມີໄລຍະຮ່າງເວລາລະຫວ່າງການມີລູກແຕ່ລະຄົນ ແມ່ນສາມາດ ຊ່ວຍເຮັດໃຫ້ເຈົ້າສ້າງຄວາມໝັ້ນຄົງໃຫ້ກັບຊີວິດຂອງລູກໆທີ່ຈະເກີດ, ແລະມັນກໍ່ຍັງເຮັດໃຫ້ເຈົ້າມີເວລາ, ກຳລັງກາຍ ແລະ ເງິນຄຳຫຼາຍຂຶ້ນ ເພື່ອໃຊ້ໃນການລ້ຽງດູລູກໆຂອງເຈົ້າທີ່ໄດ້ເກີດມາແລ້ວນັ້ນ.
- ການຕັດສິນໃຈໄດ້ວ່າ ຈະມີລູກ ແລະ ຈະມີເມື່ອໃດ - ໂດຍບໍ່ຕ້ອງໃຫ້ຄົນອື່ນມາບອກວ່າ ເຈົ້າຄວນມີ ຫຼື ບໍ່ຄວນມີ - ນັ້ນເຮັດໃຫ້ເຈົ້າເປັນເຈົ້າຂອງຊີວິດຂອງຕົນເອງຫຼາຍຂຶ້ນ.
- ຖ້າວ່າເຈົ້າ ຫຼື ຄູ່ຊີວິດຂອງເຈົ້າ ບໍ່ຕ້ອງການ ຫຼື ບໍ່ພ້ອມທີ່ຈະມີລູກ, ເຈົ້າກໍ່ຍັງສາມາດ ມີເພດສຳພັນໄດ້ ຕາມປົກກະຕິ ໂດຍບໍ່ຕ້ອງເປັນຫ່ວງວ່າຈະຖືພາ.
- ການວາງແຜນຄອບຄົວ ຊ່ວຍໃຫ້ແມ່ຍິງຫຼີກເວັ້ນຈາກການເອົາລູກອອກແບບບໍ່ປອດໄພ, ເຊິ່ງເປັນສາເຫດທີ່ພາໃຫ້ ແມ່ຍິງເປັນຈຳນວນຫຼາຍພັນຄົນເສຍຊີວິດໃນແຕ່ລະປີ.
ການເວົ້າກ່ຽວກັບ ການວາງແຜນຄອບຄົວ, ການມີເພດສຳພັນ, ການຖືພາ — ບາງຄັ້ງມັນກໍ່ເປັນເລື່ອງທີ່ຍາກ. ໃນປຶ້ມ ຂອງ ອົງການເຮັດສະປີຣຽນ (Hesperian) “ກິດຈະກໍາ ເພື່ອສຸຂະພາບແມ່ຍິງ” ໄດ້ແນະນຳ ຫຼາຍວິທີທາງ ເພື່ອໃຫ້ທັງ ຍິງຊາຍ ຫັນໜ້າມາລົມກັນກ່ຽວກັບການວາງແຜນຄອບຄົວ ແລະ ບັນຫາສຸຂະພາບຕ່າງໆຂອງແມ່ຍິງ.
ຜູ້ຄົນຈຳນວນໜຶ່ງຕ້ອງການມີລູກຫຼາຍຄົນ ເພາະເຫດຜົນທີ່ວ່າແມ່ນຍ້ອນຢາກໃຫ້ບັນດາລູກໆຈະຊ່ວຍເຮັດວຽກ ແລະ ດູແລ ພໍ່ແມ່ ໃນເວລາ ເຖົ້າແກ່ຊະລາ. ນີ້ແມ່ນຄວາມຈິງທີ່ສຸດ ໂດຍສະເພາະຢູ່ໃນບ່ອນທີ່ຜູ້ຄົນບໍ່ມີການແບ່ງ ສັນປັນສ່ວນ ຊັບພະຍາກອນຕ່າງໆທີ່ມີຢ່າງເປັນທຳ ແລະ ມັນເປັນເຫດຜົນທີ່ມັກພາໃຫ້ເດັກນ້ອຍເສຍຊີວິດ ເມື່ອຍັງເຍົາໄວຢູ່.
 |
 |
ສະຖານະການແມ່ນມີຄວາມແຕກຕ່າງກັນໃນບັນດາປະເທດທີ່ມີການແບ່ງສັນປັນສ່ວນຊັບພະຍາກອນ ແລະ ສິດ ຜົນປະໂຫຍດຕ່າງໆຢ່າງຍຸດຕິທຳ. ຕາມປົກກະຕິແລ້ວໃນບັນດາປະເທດທີ່ມີວຽກເຮັດງານທຳ, ທີ່ຢູ່ອາໃສ ແລະ ລະບົບ ສາທາລະນະສຸກ, ແລະ ເພດຍິງມີໂອກາດຢ່າງເທົ່າທຽມໃນການໄດ້ຮັບການສຶກສາ, ມີວຽກເຮັດງານທຳ ແລະ ມີສິດທິ ເປັນເຈົ້າຕົນເອງນັ້ນ, ປະຊາຊົນແມ່ນເລືອກທີ່ຈະມີຄອບຄົວຂະໜາດນ້ອຍ. ເຫດຜົນ ສ່ວນໜຶ່ງ ກໍ່ ເພາະວ່າ ພວກເຂົາ ບໍ່ໄດ້ເພິ່ງພາອາໃສລູກເຕົ້າເພື່ອສ້າງ ເສດຖະກິດຂອງຄອບຄົວໃຫ້ໝັ້ນຄົງ, ແລະ ພວກເຂົາ ກໍ່ມີຄວາມເຊື່ອໝັ້ນ ຫຼາຍຂຶ້ນ ວ່າລູກຂອງພວກເຂົາທີ່ມີຈະມີສຸຂະພາບແຂງແຮງດີ ແລະສາມາດມີຊີວິດລອດໄດ້.
ຜູ້ຄົນນຳໃຊ້ການວາງແຜນຄອບຄົວກໍ່ຕໍ່ເມື່ອ:
- ມັນເປັນວິທີທີ່ພວກເຂົາມີຄວາມສາມາດຈ່າຍໄດ້ ຫຼືບໍ່ໄດ້ເສຍຄ່າໃຊ້ຈ່າຍຫຍັງ.
- ການວາງແຜນຄອບຄົວແມ່ນມີຫຼາກຫຼາຍວິທີແຕກຕ່າງກັນ, ສະນັ້ນ ຜູ້ຄົນສາມາດເລືອກໃຊ້ວິທີການ ທີ່ໄດ້ຜົນ ດີທີ່ສຸດ ສຳລັບພວກເຂົາ.
- ບໍ່ມີການບັງຄັບ ຫຼື ຕົວະຍົວະໃຫ້ນຳໃຊ້ການວາງແຜນຄອບຄົວ.
- ຝ່າຍຊາຍເຂົ້າໃຈ ແລະເຊື່ອໝັ້ນໃນຜົນດີຂອງການວາງແຜນຄອບຄົວ, ແລະເປີດໃຈຮັບຟັງ ຄວາມຕ້ອງການ ຂອງຝ່າຍຍິງ.
- ທຸກຄົນ - ບໍ່ວ່າຈະເປັນຜູ້ໜຸ່ມ ຫຼື ຜູ້ມີອາຍຸ, ຜູ້ທີ່ມີຄອບຄົວ ຫຼື ຜູ້ທີ່ບໍ່ມີຄອບຄົວ, ແລະຜູ້ທີ່ມີຄວາມພິການ - ສາມາດ ນຳໃຊ້ການວາງແຜນຄອບຄົວໄດ້ຢ່າງງ່າຍດາຍ.
ການວາງແຜນຄອບຄົວແມ່ນເພື່ອໃຜ?
ຜູ້ຄົນບາງສ່ວນຄິດວ່າການວາງແຜນຄອບຄົວແມ່ນສຳລັບແມ່ຍິງທີ່ແຕ່ງງານແລ້ວເທົ່ານັ້ນ. ແຕ່ວ່າທັງຄົນທີ່ແຕ່ງງານ ແລະຍັງບໍ່ ທັນແຕ່ງງານຕ່າງກໍ່ມີເພດສຳພັນ ແລະແມ່ຍິງຫຼາຍຄົນກໍ່ຢາກຈະມີເພດສຳພັນ ໄດ້ໂດຍປາສະຈາກ ຄວາມວິຕົກກັງວົນຢ້ານວ່າຈະມີລູກ. ນອກຈາກນັ້ນ, ແມ່ຍິງກໍ່ບໍ່ຄ່ອຍຈະມີທາງອື່ນໃຫ້ເລືອກຫຼາຍປານໃດ ໃນການ ມີເພດສຳພັນ. ເຊິ່ງແມ່ຍິງບາງຄົນກໍ່ຖືກກົດດັນ ແລະບາງຄົນກໍ່ຖືກບັງຄັບໂດຍໃຊ້ຄວາມຮຸນແຮງເພື່ອໃຫ້ຮ່ວມເພດ. ຖ້າປາດສະຈາກການວາງແຜນຄອບຄົວ ຫຼື ການຄຸມກຳເນີດແລ້ວແມ່ຍິງຜູ້ໃດກໍ່ຕາມ - ບໍ່ວ່າຈະແຕ່ງງານ ຫຼືຍັງບໍ່ທັນ ແຕ່ງງານ, ຄົນໜຸ່ມ ຫຼືແກ່ - ກໍ່ລ້ວນແລ້ວແຕ່ ສາມາດທີ່ຈະຖືພາໄດ້. ໃນຖານະທີ່ເປັນພະນັກງານສາທາລະນະສຸກຜູ້ໜຶ່ງ, ການແບ່ງປັນສິ່ງທີ່ເຈົ້າຮູ້ກ່ຽວກັບການວາງແຜນຄອບຄົວ ໃຫ້ກັບແມ່ຍິງທຸກໆຄົນໄດ້ຮູ້ນັ້ນເປັນສິ່ງທີ່ສຳຄັນ.
ນອກນັ້ນ ເຈົ້າກໍ່ຍັງຕ້ອງໄດ້ຊອກຫາວິທີທາງທີ່ຈະບອກເລົ່າ ຫຼືແບ່ງປັນສິ່ງທີ່ເຈົ້າຮູ້ກ່ຽວກັບ ການວາງແຜນຄອບຄົວ ໃຫ້ກັບຜູ້ຊາຍໄດ້ເຂົ້າໃຈນຳ. ວິທີການບາງຢ່າງເຊັ່ນ: ການໃຊ້ຖົງຢາງອະນາໄມ, ເຊິ່ງມັນກໍ່ຕ້ອງໃຫ້ຜູ້ຊາຍ ປະຕິບັດນຳ ແລະ ຜູ້ຊາຍກໍ່ມັກຄາດຫວັງຢາກສະແດງຂໍ້ຄິດເຫັນກ່ຽວກັບວິທີການວາງແຜນຄອບຄົວທີ່ຜູ້ຍິງນຳໃຊ້ນັ້ນ. ການຊ່ວຍໃຫ້ຜູ້ຊາຍ ເຂົ້າໃຈເຖິງຜົນດີຂອງການວາງແຜນຄອບຄົວ ສາມາດຊ່ວຍໃຫ້ພວກເຂົາເຈົ້າຂ້າມຜ່ານ ຄວາມວິຕົກກັງວົນໃຈ ທີ່ມີກ່ຽວກັບການວາງແຜນຄອບຄົວ ແລະຊ່ວຍໃຫ້ພວກເຂົາເຈົ້າ ເຂົ້າໃຈໄດ້ເຖິງຜົນປະໂຫຍດໂດຍກົງຂອງມັນ ທີ່ມີຕໍ່ພວກເຂົາເຈົ້າເຊັ່ນກັນ.
ການຄວາມຮູ້ຜູ້ຊາຍໃຫ້ເຂົ້າກ່ຽວກັບການວາງແຜນຄອບຄົວກໍ່ຍັງເຮັດໃຫ້ມັນງ່າຍຂຶ້ນສຳລັບແມ່ຍິງເພື່ອລົມກັບຜົວ ຫຼືຄູ່ຂອງຕົນ ກ່ຽວກັບການວາງແຜນຄອບຄົວ, ແລະເປັນການງ່າຍສຳລັບພວກເຂົາທັງສອງ ໃນການຕັດສິນໃຈຮ່ວມກັນ ວ່າຈະນຳໃຊ້ວິທີການວາງແຜນຄອບຄົວແບບໃດດີ. ພາຍຫຼັງທີ່ໄດ້ຮັບຮູ້ເຖິງຂໍ້ດີຂອງການວາງແຜນຄອບຄົວແລ້ວ ຖ້າວ່າ ຜູ້ຊາຍ ຍັງບໍ່ຕ້ອງການ ທີ່ນຳໃຊ້ມັນ, ທາງຜູ້ຍິງກໍ່ຈຳເປັນຕ້ອງໄດ້ຕັດສິນໃຈເອງ ຖ້າຈັ່ງໃດລາວກໍ່ຍັງຢາກໃຊ້ ວິທີການ ວາງແຜນຄອບຄົວຢູ່. ມັນກໍ່ມີວິທີການວາງແຜນຄອບຄົວຢູ່ຫຼາຍວິທີທີ່ຜູ້ຍິງສາມາດນຳໃຊ້ໄດ້ໂດຍທີ່ຜູ້ຊາຍບໍ່ຮູ້.
ສອນໃຫ້ຮູ້ ແລະ ເຂົ້າໃຈວ່າການວາງແຜນຄອບຄົວແມ່ນເຮັດແບບໃດ ແລະ ຜົນຂອງມັນມີຄືແນວໃດ
ໃຫ້ອະທິບາຍວິທີ ແລະຂັ້ນຕອນການປະຕິບັດຂອງແຕ່ລະວິທີການວາງແຜນຄອບຄົວຢ່າງຖືກຕ້ອງ ແລະ ກໍ່ໃຫ້ບອກໃຫ້ ເຂົາເຈົ້າຮູ້ ເຖິງຜົນຂ້າງຄຽງຂອງມັນຕາມຄວາມເປັນຈິງ. ເຫດຜົນຫຼັກສຳຄັນອັນໜຶ່ງ ທີ່ຜູ້ຍິງຢຸດໃຊ້ການວາງແຜນຄອບຄົວ ກໍ່ຍ້ອນຜົນຂ້າງຄຽງທີ່ບໍ່ເປັນທີ່ປາດຖະໜາຂອງມັນນັ້ນ. ແຕ່ຖ້າຫາກ ລາວຮູ້ວ່າຜົນຂ້າງຄຽງຂອງການວາງແຜນຄອບຄົວນັ້ັນ ມີຄືແນວໃດແດ່ແລ້ວ ລາວອາດຈະຢາກສືບຕໍ່ໃຊ້ວິທີການວາງແຜນຄອບຄົວນັ້ນຕໍ່ໄປຈົນກວ່າຜົນຂ້າງຄຽງນັ້ນຈະຫຼຸດລົງ.
ການຊ່ວຍເຫຼືອຄົນໜຸ່ມສາວ (ໃຫ້ຮູ້ກ່ຽວກັບການວາງແຜນຄອບຄົວ)
ຄົນໜຸ່ມສາວອາດຈະເລີ່ມ ມີຄວາມຮັກ ຫຼື ມີເພດສຳພັນກັນກ່ອນທີ່ ພວກເຂົາເຈົ້າ ໄດ້ຮຽນຮູ້ກ່ຽວກັບວິທີ ການປ້ອງ ກັນ ການຖືພາ. ຊຸມຊົນຕ່າງໆສາມາດຊ່ວຍຄົນໜຸ່ມສາວເຫຼົ່ານີ້ ໃຫ້ເຂົ້າເຖິງຂໍ້ມູນທີ່ຈຳເປັນກ່ຽວກັບ ການວາງແຜນ ຄອບຄົວ ທີ່ເຂົາເຈົ້າຕ້ອງການ ເພື່ອການຕັດສິນໃຈທີ່ຖືກຕ້ອງ. ໂຮງຮຽນຕ່າງໆກໍ່ສາມາດຈັດການສອນນັກຮຽນ ໃນເລື່ອງສຸຂະສຶກສາ ເຊິ່ງເນື້ອໃນບົດຮຽນກໍ່ລວມມີການປ້ອງກັນການຖືພານຳ; ກໍ່ສາມາດຝຶກໄວໜຸ່ມ ຜູ້ອ່າວມີອາຍຸ ແດ່ ໃຫ້ເປັນນັກສຸຂະສຶກສາ, ແລະຈັດຕາຕະລາງເວລາຕາມຄຼີນິກ ແລະບ່ອນອື່ນໆ ໄວ້ສະເພາະສຳລັບ ໃຫ້ຄຳແນະນຳ ແລະວິທີການ ໃນການປ້ອງກັນ ການມີລູກແກ່ໄວໜຸ່ມ.