Hesperian Health Guides
ບັນຫາທາງດ້ານຮ່າງກາຍ
ສະໝອງພິການມາແຕ່ກຳເນີດ (ເດັກກະຕຸກ)
ສະໝອງພິການມາແຕ່ກຳເນີດແມ່ນອາການໜຶ່ງຂອງສະໝອງພິການເຊິ່ງເຮັດໃຫ້ເດັກມີການເຄື່ອນໄຫວທີ່ຜິດປົກະຕິ.
- ສະໝອງພິການມາແຕ່ກຳເນີດແມ່ນອາການໜຶ່ງຂອງສະໝອງພິການເຊິ່ງເຮັດໃຫ້ເດັກມີການເຄື່ອນໄຫວທີ່ຜິດປົກະຕິ.
- ໃນເມື່ອເດັກໃຫຍ່ຂຶ້ນ, ເດັກຈະມີພັດທະນາການທີ່ຊ້າຜິດປົກກະຕິກວ່າເດັກທົ່ວໆໄປ. ເດັກອາດຕັ້ງຄໍ, ນັ່ງ ຫຼືຄານໄດ້ຊ້າກວ່າຄົນອື່ນ.
- ເດັກມີບັນຫາໃນການລ້ຽງ.
- ເດັກອາດແອ່ວ ແລະ ໄຫ້ຕະຫຼອດ ຫຼືເດັກອາດງຽບຜິດປົກກະຕິ.
- ເມື່ອເດັກໃຫຍ່ຂຶ້ນ, ເດັກມີການເຄື່ອນໄຫວທີ່ຜິດປົກກະຕິ ແລະ ມີການຊັກກະຕຸກ
ປະມານເຄິ່ງໜຶ່ງຂອງເດັກທີ່ມີສະຫມອງພິການມາແຕ່ກຳເນີດມີການຄິດ ແລະ ການຮຽນຮູ້ທີ່ຊ້າ. ແຕ່ບໍ່ຕ້ອງກັງວົນວ່າຈະເປັນແບບນີ້ໝົດທຸກຄົນ. ເດັກທີ່ສະໝອງພິການມາແຕ່ກຳເນີດສາມາດຫຼິ້ນ, ຮຽນຮູ້ ແລະ ໄປໂຮງຮຽນກໍໄດ້.
ສະໝອງພິການມາແຕ່ກຳເນີດບໍ່ສາມາດປິ່ນປົວໃຫ້ຫາຍຂາດໄດ້. ແຕ່ທ່ານສາມາດຊ່ວຍໃຫ້ເດັກທີ່ພິການນີ້ມີການເຄື່ອນໄຫວ, ການຊື່ສານ ແລະ ເບິ່ງແຍງຕົນເອງດ້ວຍຕົວຂອງເຂົາເອງ. ໃຫ້ສອບຖາມປຶກສາກັບສູນຟື້ນຟູຄົນພິການ ຫຼືຄຼີນິກທີ່ຢູ່ໃກ້ບ້ານທ່ານ ແລະ ໃຫ້ເບິ່ງໃນປື້ມເດັກພິການໃນໝູ່ບ້ານສຳລັບຂໍ້ມູນເພີ່ມເຕີມກ່ຽວກັບການເບິ່ງແຍງເດັກທີ່ມີສະໝອງພິການມາແຕ່ກຳເນີດ.
ສະດືສວດ (ສະດືລອດ)
ທ້ອງທີ່ສວດນູນອອກມາແບບໃນຮູບນີ້ແມ່ນເກີດມາຈາກການແຍກອອກຈາກກັນຂອງກ້າມຊີ້ນໜ້າທ້ອງ. ສ່ວນໃຫຍ່ແລ້ວມັນ ຈະປິດເອງ ແລະ ກໍບໍ່ຈໍາເປັນໃຊ້ຢາປິ່ນປົວ. ການທີ່ໃຊ້ຜ້າມາພັນບໍລິເວນນັ້ນໄວ້ມັນບໍ່ຊ່ວຍຫັຍງ (ແຕ່ຫຼັງຈາກທີ່ສະດືຫຼຸບລົງໄປ, ເດັກຈະບໍ່ເຈັບອີກ).
ຫາກວ່າມີໄສ້ສວດໃຫຍ່ອອກມາແບບນີ້ ມັນບໍ່ໄດ້ເປັນອັນຕະລາຍຫຍັງ ແລະ ສ່ວນໃຫຍ່ມັກຈະຫາຍດີເອງໄດ້. ຖ້າຫາກຍັງເຫັນຢູ່ຈົນເດັກມີອາຍຸຮອດ 5 ປີ, ຄວນໄປປຶກສາກັບແພດໝໍ. ບາງທີອາດຈຳເປັນຕ້ອງໄດ້ຜ່າຕັດ.
ອັນທະບວມ, ອັ່ງນໍ້າ ແລະ ໄສ້ເລື່ອນ
ຖົງທີ່ຫໍ່ຫຸ້ມລູກອັນທະເອີ້ນວ່າຖົງອັນທະ, ມີນໍ້າ ຫຼືພາກສ່ວນຂອງໄສ້ທີ່ຍື່ນອອກມານີ້ເປັນສາເຫດເຮັດໃຫ້ມີການບວມເບື້ອງໃດເບື້ອງໜຶ່ງຂອງອັນທະ.
ທ່ານສາມາດຫາສາເຫດຂອງບັນຫາດັ່ງກ່າວໄດ້ໂດຍການໃຊ້ໄຟສາຍຊ່ອງຈາກທາງດ້ານຫຼັງຂອງຖົງອັນທະ.
- ຖ້າວ່າມັນສາມາດຊ່ອງຜ່ານນັ້ນໝາຍວ່າຖົງອັນທະເຕັມໄປດ້ວຍນໍ້າ. ເຮົາເອີ້ນອາການນີ້ວ່າ ນໍ້າອັ່ງທີ່ຖົງອັນທະ ແລະ ສາມາດຫາຍດີເອງໄດ້. ຖ້າຫາກວ່າເປັນດົນຫຼາຍກວ່າໜຶ່ງປີຄວນໄປປຶກສາກັບແພດຫມໍ.
- ຖ້າວ່າໄຟບໍ່ສາມາດຊ່ອງຜ່ານໄດ້ ແລະ ຮູ້ສຶກວ່າຖົງອັນທະຈະມີລັກສະນະໃຫຍ່ຂຶ້ນເມື່ອເວລາເດັກໄອ ຫຼືໄຫ້, ນັ້ນ
ໝາຍວ່າພາກສ່ວນໜຶ່ງຂອງໄສ້ໄດ້ລອດລົງມາໃສ່ຖົງ. ສິ່ງນີ້ເຮົາເອີ້ນວ່າໄສ້ເລື່ອນ (ໄສ້ລອດ).
ໄສ້ເລື່ອນຈຳເປັນຕ້ອງໄດ້ປິ່ນປົວດ້ວຍການຜ່າຕັດ. ທ່ານອາດສາມາດຍູ້ມັນເຂົ້າໄປເອງກໍໄດ້ໃນເບື້ອງຕົ້ນ:
- ຫາກວ່າເປັນໄປໄດ້, ໃຫ້ຢານອນຫຼັບ (ໄດອາເຊປັມ) ແກ່ເດັກກ່ອນ.
- ໃຊ້ໝອນ, ຫຼື ໃຊ້ໄມ້ຄໍ້າດັນພາກສ່ວນລຸ່ມຂອງຕຽງ ຫຼືຜ້າເສື່ອເພື່ອເຮັດໃຫ້ສະໂພກຂອງເດັກຢູ່ສູງກວ່າຫົວຂອງເດັກ.
- ໃຫ້ເດັກງໍຫົວເຂົ່າເຂົ້າ ແລະ ໃຫ້ເດັກຍະຂາໄປເບື້ອງທີ່ໄສ້ເລື່ອນ - ເຮັດຂາຄືກັບກົບ.
- ໃຊ້ຜ້າເຢັນ ຫຼືແຜ່ນຜ້າເຢັນໃສ່ນໍ້າກ້ອນໃສ່ບ່ອນທີ່ໄສ້ເລື່ອນເພື່ອຫຼຸດຜ່ອນອາການບວມ. ປະໄວ້ 10 ນາທີ ຫຼືຫຼາຍກວ່ານັ້ນ.
- ຫາກວິທີນີ້ໃຊ້ບໍ່ໄດ້ຜົນ, ພະຍາຍາມລອງເອົາມືດັນໄສ້ເລື່ອນຄ່ອຍໆເພື່ອໃຫ້ມັນເຂົ້າທີ່.
ເຖິງຢ່າງໃດກໍແລ້ວແຕ່ ເດັກກໍຍັງຕ້ອງການການຜ່າຕັດຢູ່ດີ, ເຖິງວ່າທ່ານຈະດັນເອົາໄສ້ເຂົ້າໄປແລ້ວກໍຕາມ.
ຖົງອັນທະທີ່ເຈັບແບບຮຸນແຮງ, ໂດຍສະເພາະຫາກເກີດຂຶ້ນກະທັນຫັນ, ສ່ວນໃຫຍ່ມັກມີການບິດຢູ່ທາງໃນຮ່າງກາຍ. ເຮົາເອີ້ນອາການນີ້ວ່າ ອັນທະບິດ ແລະ ເດັກຈະຕ້ອງໄດ້ຮັບການຜ່າຕັດທັນທີເພື່ອຮັກສາແກ່ນອັນທະໄວ້.