Hesperian Health Guides
ຖ້າທ່ານຫາກຕັດສິນໃຈໃຊ້ເຄື່ອງຊ່ວຍໃນການຟັງ
ຂໍ້ມູນສຸຂະພາບ > ການຊ່ວຍເຫຼືອເດັກນ້ອຍຫູໜອກ > ພາກພະນວກ I: ເຄື່ອງຊ່ວຍໃນການຟັງ > ຖ້າທ່ານຫາກຕັດສິນໃຈໃຊ້ເຄື່ອງຊ່ວຍໃນການຟັງ
- ຈະຊ່ວຍເຫຼືອລູກຂອງທ່ານໃສ່ເຄື່ອງຊ່ວຍການຟັງນັ້ນແນວໃດ.
- ຈະຮັກສາເຄື່ອງຊ່ວຍການຟັງດັ່ງກ່າວນັ້ນແນວໃດ.
- ຈະກວດກາເຄື່ອງຊ່ວຍການຟັງດັ່ງກ່າວນັ້ນ ໃນແຕ່ລະມື້ນັ້ນແນວໃດ. ເພື່ອໃຫ້ແນ່ໃຈວ່າ ມັນຍັງສາມາດເຮັດວຽກໄດ້ຢູ່.
- ຈະເຮັດແນວໃດເມື່ອເຄື່ອງຊ່ວຍດັ່ງກ່າວນັ້ນບໍ່ເຮັດວຽກ.
ວິທີທີ່ຈະຊ່ວຍເຫຼືອລູກຂອງທ່ານໃສ່ເຄື່ອງຊ່ວຍໃນການຟັງ
ເດັກທຸກໆຄົນຈະມີປະຕິກິລິຍາທີ່ແຕກຕ່າງກັນ ໃນການທີ່ຈະໃສ່ເຄື່ອງຊ່ວຍໃນການຟັງ ໃຫ້ແກ່ພວກເຂົາ. ເດັກບາງຄົນກໍ່ໄດ້ຖົກເອົາເຄື່ອງຊ່ວຍໃນການຟັງນັ້ນອອກໂດຍທັນທີ. ເດັກບາງຄົນກໍ່ຮູ້ສຶກວ່າມັນບໍ່ມີຄວາມສະດວກສະບາຍເລີຍໃນຕອນທຳອິດ. ສະນັ້ນໃນຕອນທຳອິດ ແມ່ນໃຫ້ລູກຂອງທ່ານໃຊ້ເຄື່ອງຊ່ວຍໃນການຟັງ ປະມານ 15-30 ນາທີ ເສຍກ່ອນ, ຕໍ່ຈາກນັ້ນ ກໍ່ຄ່ອຍເພີ່ມໄລຍະທີ່ລູກຂອງ ທ່ານໃຊ້ເຄື່ອງຊ່ວຍດັ່ງກ່າວນັ້ນຂຶ້ນ ເທື່ອລະເລັກລະໜ້ອຍ, ມັນຈະຕ້ອງໄດ້ໃຊ້ເວລາຫຼາຍອາທິດສຳລັບເຂົາໃນການທີ່ຈະທຳຄວາມຄຸ້ນເຄີຍກັບເຄື່ອງຊ່ວຍໃນການຟັງດັ່ງກ່າວ.
ການໃຊ້ເຄື່ອງຊ່ວຍໃນການຟັງ ໃນສະພາບແວດລ້ອມທີ່ມິດງຽບນັ້ນ, ຈະຊ່ວຍໃຫ້ລູກ ຂອງທ່ານໄດ້ເກີດຄວາມສຳນຶກຕໍ່ສຽງໃໝ່ໆ ທີ່ເຂົາໄດ້ຍິນ. ຈົ່ງຊ່ວຍເຂົາໃນການສັງເກດສຽງ ດ້ວຍການນຳເອົາລູກ ຂອງທ່ານມາໃກ້ໆສຽງ ຫຼື ເອົາມືໃຊ້ໃສ່ບ່ອນທີ່ສຽງດັງອອກມາສູ່ຫູ ຂອງເຂົານັ້ນ.
ຈະຮູ້ໄດ້ແນວໃດ ຖ້າລູກຂອງທ່ານໄດ້ຍິນສຽງໃໝ່ໆ
ບໍ່ຄວນຄາດຫວັງໃຫ້ລູກຂອງທ່ານມີປະຕິກິລິຍາຕໍ່ສຽງຕ່າງໆໄດ້ໃນທັນທີ. ເພາະວ່າລູກ ຂອງທ່ານຈະຕ້ອງໄດ້ຮຽນຮູ້ໃນການສຳນຶກກ່ຽວກັບສຽງຫຼັງຈາກທີ່ເຂົາໄດ້ໃຊ້ເຄື່ອງຊ່ວຍໃນ ການຟັງແລ້ວ. ການມີປະຕິກິລິ ຍາຂອງລູກທ່ານຕໍ່ກັບສຽງນັ້ນ ແມ່ນຂຶ້ນກັບອາຍຸຂອງພວກເຂົາ ແລະ ປະລິມານສຽງທີ່ເຂົາໄດ້ຍິນສຽງນັ້ນຫຼາຍພຽງໃດ. ທ່ານອາດຈະຕ້ອງສັງເກດໃຫ້ລະອຽດ ໃນການຕິດຕາມປະຕິກິລິຍາຂອງລູກຂອງທ່ານ ເຊິ່ງເຂົາອາດຈະ:
- ກະພິບຕາ ຫຼື ຢຸດເຊົາກະທຳໃນສິ່ງທີ່ເຂົາກຳລັງກະທຳຢູ່ນັ້ນ.
- ມ່ວນຊື່ນກັບການຫຼິ້ນຂອງຫຼິ້ນທີ່ມີສຽງ.
- ຮ້ອງໄຫ້ ເມື່ອເຂົາໄດ້ຍິນສຽງ.
- ແນມເບິ່ງ ຫຼື ຫຼຽວໄປມາເມື່ອເຂົາໄດ້ຍິນສຽງ.
ມັນອາດເປັນຫຼາຍອາທິດ ຫຼື ຫຼາຍເດືອນ ກ່ອນເຈົ້າຈະເຫັນລູກສະແດງອາການໂຕ້ຕອບສຽງໄດ້.
ຊ່ວຍເຫຼືອລູກຂອງທ່ານ ໃຫ້ເຂົ້າໃຈເຖິງບັນດາສຽງໃໝ່ໆທີ່ເຂົາໄດ້ຍິນ
ເຖິງແມ່ນວ່າເຄື່ອງຊ່ວຍການຟັງ ຊ່ວຍໃຫ້ລູກຂອງທ່ານສາມາດໄດ້ຍິນສຽງ, ແຕ່ເຂົາອາດຈະບໍ່ເຂົ້າ ໃຈໃນສຽງ ທີ່ເຂົາໄດ້ຍິນໃນປະຈຸບັນນັ້ນ. ລູກຂອງທ່ານອາດຈະຕ້ອງການເຝິກຊ້ອມໃນການຟັງສຽງຕ່າງໆກັບເຄື່ອງຊ່ວຍໃນການຟັງ. ຈົ່ງເບິ່ງໃນບົດທີ 6 ສຳລັບບັນດາກິດຈະກຳທີ່ຊ່ວຍເດັກໃນການຟັງ.