Hesperian Health Guides
ຄຳແນະນຳສຳລັບຜູ້ເປັນພໍ່ແມ່
ຂໍ້ມູນສຸຂະພາບ > ການຊ່ວຍເຫຼືອເດັກນ້ອຍຫູໜອກ > ຄຳແນະນຳສຳລັບຜູ້ເປັນພໍ່ແມ່
ທ່ານຄວນດັດປັບເອົາບັນດາກິດຈະກຳທີ່ຢູ່ໃນພາກນີ້ມາໝູນໃຊ້ ເພາະວ່າ ຖ້າເດັກນ້ອຍໄດ້ຢູ່ໃກ້ສຽງຕ່າງໆເລື້ອຍໆ ເຂົາອາດສາມາດໄດ້ຍິນ. ຍົກຕົວຢ່າງ: ຖ້າຫາກທ່ານຮູ້ວ່າ ເດັກນ້ອຍຜູ້ນັ້ນ ສາມາດໄດ້ຍິນສຽງໂທນຕ່ຳ ບໍ່ແມ່ນສຽງໂທນສູງ, ກໍ່ຈົ່ງໃຊ້ສຽງໂທນຕ່ຳ ເພື່ອມາໝູນໃຊ້ໃນກິດຈະກຳ ຖ້າທ່ານຍັງບໍ່ແນ່ໃຈວ່າ ສຽງປະເພດໃດທີ່ລາວສາມາດໄດ້ຍິນໃຫ້ທ່ານທົດລອງຫຼາຍປະເພດສຽງ. ເບິ່ງຂໍ້ມູນເພີ່ມຕື່ມໄດ້ໃນບົດທີ5.
| ກິດຈະກຳ |
ເນື້ອໃນ
ວິທີ ທີ່ຈະຊ່ວຍໃຫ້ເດັກສັງເກດສຽງຕ່າງໆ
- ເມື່ອທ່ານໄດ້ຍິນສຽງທີ່ເກີດຂຶ້ນຢູ່ໃນບໍລິເວນໃກ້ໆ, ຈົ່ງສະແດງໃຫ້ເດັກນ້ອຍຮູ້ວ່າ ມີບາງສິ່ງບາງຢ່າງໄດ້ກຳລັງເກີດຂຶ້ນຢູ່ມໍ່ໆນັ້ນ, ກະຕູ້ນໃຫ້ເດັກຫຼຽວໜ້າໄປຫາສຽງດັ່ງກ່າວ.
- ໃຫ້ເດັກໄດ້ຫຼິ້ນເຄື່ອງຫຼິ້ນທີ່ມີສຽງ. ຮຽກຮ້ອງຄວາມສົນໃຈຂອງເດັກດ້ວຍເຄື່ອງຫຼິ້ນດັ່ງກ່າວຫຼາຍໆຄັ້ງ, ຖ້າເຄື່ອງຫຼິ້ນດັ່ງກ່າວຫາກບໍ່ມີສຽງດັງ, ທ່ານອາດຈະນຳເອົາບາງສິ່ງບາງຢ່າງເຊັ່ນ: ກະດິງມາຜູກຕິດໃສ່ ເພື່ອເຮັດໃຫ້ມັນມີສຽງດັງຂຶ້ນ.
- ຊອກອຸປະກອນທີ່ທ່ານສາມາດເຮັດໃຫ້ມີສຽງດັງຂຶ້ນ ຫຼື ຢຸດໄດ້. ສະແດງໃຫ້ເດັກຮູ້ວ່າກຳລັງຈະມີບາງສິ່ງເກີດຂຶ້ນ ຫຼັງຈາກນັ້ນ ຈຶ່ງສ້າງສຽງດັງກ່າວ, ເຮັດໃຫ້ສຽງດັງຂຶ້ນຫຼາຍຄັ້ງ ຊ້ໍາໄປຊ້ໍາມາ. ພະຍາຍາມຊີ້ໄປທີ່ໃບຫູຂອງທ່ານ ເມື່ອສຽງນັ້ນດັງຂຶ້ນ ເຊິ່ງມັນຈະຊ່ວຍໃຫ້ເດັກຮູ້ວ່າໄດ້ມີສຽງບາງສິ່ງບາງຢ່າງດັງຂຶ້ນແລ້ວ.
- ປະດິດສ້າງເກມທີ່ເດັກນ້ອຍຕ້ອງຕັ້ງໃຈຟັງ ເພື່ອຫຼິ້ນເກມດັ່ງກ່າວ.
 ເມື່ອເດັກນ້ອຍໄດ້ຍິນສຽງກອງໃຫ້ພວກເຂົາເຕັ້ນ. |
 ຖ້າດົນຕີຢຸດ ໃຫ້ເດັກນ້ອຍ ພ້ອມກັນນັ່ງລົງ. |
ບັນດາວິທີ ທີ່ຊ່ວຍໃຫ້ລູກຂອງທ່ານສັງເກດສຽງປາກເວົ້າ
- ເວົ້າກັບເດັກນ້ອຍໃນຂະນະທີ່ອຸ້ມເຂົາເຈົ້າ, ເມື່ອເດັກຈັບເອິກ, ຄໍ ຫຼື ແກ້ມຂອງທ່ານ ເຊິ່ງເຂົາເຈົ້າຈະສາມາດສຳຜັດເອົາຄວາມສັ່ນສະເທື່ອນຈາກສຽງຂອງທ່ານໄດ້.
- ໃນຂະນະທີ່ທ່ານເຮັດສິ່ງໃດໜຶ່ງ ກັບເດັກນ້ອຍ, ຈົ່ງພະຍາຍາມສ້າງສຽງໄປພ້ອມກັບກິດຈະກຳດັ່ງກ່າວ.
- ຮ້ອງຊື່ຂອງເດັກເລື້ອຍໆ.
- ເມື່ອເດັກນ້ອຍຮູ້ຈັກຊື່ຂອງຕົນເອງ, ຈົ່ງໃຊ້ຊື່ຂອງເຂົາເຂົ້າໃນບົດເພງ ແລະ ນິທານ ເຊິ່ງສິ່ງນີ້ ຈະຊ່ວຍດຶງດູດຄວາມສົນໃຈຂອງເດັກນ້ອຍ.
- ເວົ້າກັບລູກນ້ອຍຂອງທ່ານເລື້ອຍໆເທົ່າທີ່ຈະເຮັດໄດ້, ໃຊ້ສຽງເວົ້າຂອງທ່ານທີ່ມີສຽງແຕກຕ່າງກັນພະຍາຍາມຢຶດສຽງເວົ້າຂອງທ່ານໃຫ້ຍາວອອກ, ແລະ ມີສຽງຕ່ຳ, ສຽງສູງ. ນຳໃຊ້ຄຳສັບທີ່ມີຄວາມໝາຍກົງກັນຂ້າມກັນ.
ວິທີຮຽນຮູ້ວ່າສຽງມາຈາກທິດທາງໃດ
- ຖ້າລູກຂອງທ່ານຫາກສົນໃຈເຄື່ອງຫຼິ້ນທີ່ມີສຽງ ແລະ ທ່ານເອງກໍ່ໝັ້ນໃຈວ່າ ເຂົາໄດ້ຍິນສຽງຂອງມັນ, ຈົ່ງພະຍາຍາມຍ້າຍເຄື່ອງຫຼິ້ນອັນນັ້ນ ອອກຈາກຂອບເຂດທີ່ເຂົາສາມາດແນມເຫັນ. ຈາກນັ້ນເຮັດໃຫ້ເຄື່ອງຫຼິ້ນນັ້ນ ດັງຢູ່ລະດັບທີ່ສູງກວ່າຫູຂອງເຂົາ ເພື່ອສັງເກດວ່າ ເດັກຈະຫັນໜ້າມາຊອກມັນບໍ່, ເມື່ອເດັກສາມາດຮູ້ໄດ້ແລ້ວ ຈົ່ງເຮັດໃຫ້ເຄື່ອງຫຼິ້ນນັ້ນດັງ ຢູ່ໃນລະດັບທີ່ຕ່ຳກວ່າຫູ, ສຸດທ້າຍແມ່ນ ເຮັດໃຫ້ມັນດັງຢູ່ທາງຫຼັງຂອງເດັກ.
ຈົ່ງພະຍາຍາມມີຄວາມອົດທົນ ເພາະວ່າມັນອາດໃຊ້ເວລາເປັນເດືອນ ຈົນກວ່າເດັກຈະສາມາດ ຫັນ ໜ້າໄປຫາສຽງນັ້ນໄດ້, ເມື່ອເຂົາມີການຕອບສະໜອງຕໍ່ສຽງດ່ັງກ່າວໃນບາງເທື່ອ (ອາດຈະບໍ່ແມ່ນທຸກໆເທື່ອ) ໃຫ້ທ່ານສາມາດກ້າວໄປຫາຂັ້ນຕອນຕໍ່ໄປ.
- ປ່ຽນສີໜ້າຂອງທ່ານ ແລະ ໃຊ້ທ່າທາງເພື່ອດຶງດູດຄວາມສົນໃຈຂອງເດັກ ເຊັ່ນ: ການຊີ້ໄປທີ່ໃບຫູ ແລະ ຫຼັງຈາກນັ້ນ ແມ່ນຊີ້ໄປທີ່ມາຂອງສຽງນັ້ນ.
- ລອງຊອກເຄື່ອງຫຼິ້ນທີ່ມີສຽງດັງໃນຖົງເສື້ອ, ສັງເກດເບິ່ງວ່າ ເດັກສາມາດຊອກຫາມັນໄດ້ບໍ່ ໃນຂະນະທີ່ທ່ານເຮັດໃຫ້ມັນມີສຽງດັງ.
ວິທີ ເພ່ືອຊ່ວຍໃຫ້ລູກຂອງທ່ານສາມາດຈື່ຈຳສຽງ
- ສັງເກດບັນດາສຽງທົ່ວໄປ ທີ່ເຂົາສາມາດ ໄດ້ຍິນ ແລະ ຊ່ວຍເຂົາຕັ້ງຊື່ສຽງເຫຼົ່ານັ້ນ.
- ເມື່ອເດັກສະແດງຄວາມສົນໃຈຕໍ່ສຽງເຫຼົ່ານັ້ນ. ອະທິບາຍໃຫ້ເຂົາຮູ້ວ່າແມ່ນສຽງຫຍັງ.
- ພາເດັກນ້ອຍໄປຕາມສະຖານທີ່ຕ່າງໆ ເມື່ອທ່ານໄດ້ຍິນສຽງໃດໜຶ່ງ ຈົ່ງສະແດງ ໃຫ້ເຂົາຮູ້ວ່າ ສຽງມາຈາກໃສ່? ແມ່ນຫຍັງເຮັດໃຫ້ສຽງນັ້ນດັງ.
- ບອກວິທີໃຫ້ເດັກສ້າງສຽງຕ່າງໆທີ່ ແຕກຕ່າງກັນດ້ວຍຕົວຂອງເຂົາເອງ.
ວິທີຊ່ວຍໃຫ້ລູກຂອງທ່ານສັງເກດ ເມື່ອມີສອງສຽງແຕກຕ່າງກັນ
- ຊອກຫາອຸປະກອນ ສອງຢ່າງທີ່ສາມາດກໍ່ໃຫ້ເກີດສຽງສອງສຽງ ທີ່ແຕກຕ່າງກັນ. ແຕ່ຈົ່ງຈື່ໄໄວ້ວ່າ ອຸປະກອນດ່ັງກ່າວຕ້ອງມີໂທນສຽງ ແລະ ຄວາມດັງທີ່ເໝາະສົມທີ່ເດັກສາມາດໄດ້ຍິນ. ວາງອຸປະກອນດັ່ງກ່າວໄວ້ຂ້າງໜ້າຂອງເດັກ. ທຳອິດສ້າງສຽງດັງທີ່ເກີດຈາກອຸປະກອນທັງສອງຢ່າງນັ້ນ. ຈາກນັ້ນໃຫ້ເຂົາຫຼັບຕາ ແລ້ວທ່ານກໍ່ເຄາະ ຫຼື ສຽງຈາກອຸປະກອນອັນໃດອັນໜຶ່ງ, ເມື່ອເຂົາມືນຕາຂຶ້ນຈິ່ງຖາມລາວວ່າ ແມ່ນສິ່ງໃດທີ່ເຮັດໃຫ້ເກີດສຽງດັງຫວ່າງກີ້ນີ້.
-
ພ້ອມກັນນັ້ນ ໃຫ້ຄິດຫາການໃຊ້ທ່າທາງສຳລັບຈັງຫວະສຽງ 2 ຫຼື 3 ແບບທີ່ຄ້າຍຄືກັນ. ຈາກນັ້ນໃຫ້ເດັກສະແດງທ່າທາງດັ່ງກ່າວ ໃນຂະນະທີ່ທ່ານເຮັດສຽງດັ່ງກ່າວ.
ປາ...ປາ... ປາ...ປາ
ລາ... ລາ... ລາ...ລາ
ເຊິ່ງນີ້ແມ່ນຕົວຢ່າງຂອງສຽງທີ່ເກີດຈາກຄຳເວົ້າ. - ໃຫ້ລູກຂອງທ່່ານ ຟັງສຽງຂອງສະມາຊິກໃນຄອບຄົວ ແລ້ວເດົາວ່າ ນັ້ນແມ່ນສຽງຂອງໃຜ.ເຊິ່ງວິທີນີ້ຈະຊ່ວຍເຮັດໃຫ້ເດັກສາມາດຈຳແນກວ່າ ແມ່ນສຽງຂອງຜູ້ຊາຍ ຫຼື ແມ່ຍິງ ທີ່ກຳລັງເວົ້າອີກດ້ວຍ.
ລູກຂອງຂ້ອຍກຳລັງຮຽນຮູ້ການຟັງຢູ່ບໍ?
ທ່ານຕ້ອງໄດ້ເຮັດກິດຈະກຳທັງໝົດເຫຼົ່ານີ້ຫຼາຍໆຄັ້ງ, ຊ້ໍາແລ້ວຊ້ໍາອີກ. ຫຼັງຈາກນັ້ນ 6 ເດືອນ ຈຶ່ງກວດເບິ່ງຄວາມສາມາດໃນການໄດ້ຍິນຂອງເດັກອີກເທື່ອໜຶ່ງ (ເບິ່ງບົດທີ 5). ທ່ານອາດຈະສັງເກດເຫັນວ່າ ລູກຂອງທ່ານສາມາດໄດ້ຍິນສຽງຕ່າງໆຫຼາຍຂຶ້ນ, ເຊິ່ງນີ້ກໍ່ໍບໍ່ໄດ້ໝາຍຄວາມວ່າ ຄວາມອສາມາດໃນການໄດ້ຍິນຂອງເຂົາໄດ້ມີການປ່ຽນແປງ, ແຕ່ມັນໝາຍຄວາມວ່າ ເຂົາໄດ້ຮຽນຮູ້ການນຳໃຊ້ຄວາມສາມາດໃນການໄດ້ຍິນຂອງເຂົາໄດ້ດີຂຶ້ນ. ຈົ່ງຍ້ອງຍໍຊົມເຊີຍ ເມື່ອລູກຂອງທ່ານສາມາດສັງເກດສຽງ ແລະ ຄຳເວົ້າໄດ້.
ໄປພ້ອມໆກັບການຝຶກແອບຂ້າງເທິງນັ້ນ, ຈົ່ງພະຍາຍາມເສີມສ້າງທີ່ເດັກໄດ້ຮຽນໄປແລ້ວນັ້ນໂດຍໝູນໃຊ້ສຽງຕ່າງໆ ທີ່ເຂົາສາມາດໄດ້ຍິນ. ເມື່ອເດັກສາມາດຮຽນຮູ້ຄຳສັບ ແລະ ຄວາມໝາຍຂອງມັນໄດ້ດີຂຶ້ນ ເດັກຄົນນັ້ນກໍ່ຈະສາມາດສະແດງອອກເຖິງຄວາມຮູ້ສຶກຂອງເຂົາ ແລະ ສາມາດສື່ສານກັບບຸກຄົນອື່ນໄດ້ດີຂຶ້ນອີກດ້ວຍ.