Hesperian Health Guides
ບົດທີ 5: ລູກຂອງທ່ານສາມາດໄດ້ຍິນສຽງຫຍັງແດ່?
ຂໍ້ມູນສຸຂະພາບ > ການຊ່ວຍເຫຼືອເດັກນ້ອຍຫູໜອກ > ບົດທີ 5: ລູກຂອງທ່ານສາມາດໄດ້ຍິນສຽງຫຍັງແດ່?
ເດັກບາງຄົນກໍ່ຫູໜວກສະໜິດ ແລະ ບໍ່ສາມາດໄດ້ຍິນສິ່ງໃດເລີຍ ຫຼື ສາມາດໄດ້ຍິນພຽງແຕ່ສຽງດັງໆເທົ່ານັ້ນ. ເມື່ອເດັກຍັງອ່ອນຜູ້ເປັນພໍ່ແມ່ສາມາດສັງເກດເຫັນວ່າລູກຂອງຕົນບໍ່ສາມາດຮັບຮູ້ທາງຫູໄດ້ເພາະ ວ່າ ເດັກບໍ່ມີການໝູນຫົວຂອງພວກເຂົາ ຫຼື ຕອບສະໜອງ, ເຖິງແມ່ນວ່າ ຈະເປັນສຽງທີ່ດັງແຮງກໍຕາມ.
ຍັງມີເດັກຫຼາຍໆຄົນທີ່ພິການທາງຫູທີ່ສາມາດໄດ້ຍິນສຽງສ່ວນໃດສ່ວນໜຶ່ງ. ກໍ່ລະນີການສູນເສຍການຟັງປະເພດດັ່ງກ່າວນີ້ ແມ່ນເປັນການຍາກຫຼາຍສຳລັບພໍ່ແມ່ໃນການສັງເກດ. ເດັກອາດຈະສະແດງເຮັດໃຫ້ແປກໃຈ ຫຼື ມີການໝູນຫົວຂອງເຂົາໄປຫາບ່ອນທີ່ມີສຽງດັງ ແຕ່ສຽງທີ່ຄອຍຜັດບໍ່ໄດ້ອຜົນ. ເຂົາອາດຈະ ຕອບສະໜອງພຽງແຕ່ປະເພດສຽງສະເພາະໃດໜຶ່ງ. ເດັກບາງຄົນຜັດຍັງສາມາດໄດ້ຍິນພຽງເລັກໜ້ອຍເມື່ອມີຄົນເວົ້າກັບພວກເຂົາ. ພວກເຂົາອາດຈະຮຽນຮູ້ຊ້າໃນການຈົດຈຳ ແລະ ຕອບສະໜອງບາງຄຳສັບແຕ່ພວກເຂົາບໍ່ໄດ້ຍິນໝົດທຸກຄຳສັບທັງໝົດຢ່າງຈະແຈ້ງ ພໍທີ່ຈະເຂົ້າໃຈໄດ້. ເດັກທີ່ມີການສູນເສຍການຟັງປະເພດນີ້ ແມ່ນຈະມີຄວາມຊັກຊ້າໃນການຮຽນເວົ້າ.
ເດັກຫຼາຍໆຄົນທີ່ສູນເສຍການຟັງເນື່ອງຈາກການຊຶມເຊື້ອທາງຫູເປັນເວລາຍາວນານ ແລະ ຫຼາຍຄັ້ງຊ້ໍາຊາກກັນ ຫຼື ອີກສາເຫດໜຶ່ງອາດເປັນຜົນເນື່ອງມາຈາກຢາ. ຜູ້ເປັນພໍ່ແມ່ ອາດບໍ່ສັງເກດເຫັນວ່າເດັກໄດ້ ສູນເສຍການຟັງຂອງເຂົາໄປຢ່າງຊ້າໆ ຈົນກະທັ້ງເຂົາມີອາຍຸໄດ້ 4-5 ປີ ແຕ່ກໍ່ບໍ່ທັນຮຽນເວົ້າເທື່ອ ຫຼື ບໍ່ທັນສາມາດເວົ້າໄດ້ຢ່າງຈະແຈ້ງໄດ້.
ຖ້າທ່ານຫາກຮູ້ວ່າ ລູກຂອງທ່ານສາມາດຮັບຮູ້ທາງຫູໄດ້ຫຼາຍພຽງໃດນັ້ນ ມັນຈະຊ່ວຍໃຫ້ທ່ານຮູ້ວ່າ ຈະໃຫ້ການຊ່ວຍເຫຼືອແບບໃດແກ່ເຂົາ ເພື່ອໃຫ້ເຂົາສາມາດສື່ສານໄດ້. ບາງຄັ້ງພໍ່ແມ່, ເດັກຄົນອື່ນໆ ຫຼື ຄູຄິດວ່າເດັກທີ່ສູນເສຍການຟັງນັ້ນແມ່ນການຈະເລີນເຕີບໂຕທາງດ້ານຈິດໃຈຊ້າເທົ່ານັ້ນ. ຖ້າຫາກເດັກທີ່ພິການທາງຫູຫາກໄດ້ຮັບການຊ່ວຍເຫຼືອເປັນພິເສດໃນການຮຽນຮູ້ການສື່ສານນັ້ນ, ພວກເຂົາເກືອບທັງໝົດສາມາດຮຽນ ແລະ ໄດ້ຮັບການສຶກສາຄືກັບເດັກຄົນອື່ນໄດ້. ດັ່ງນັ້ນ ມັນຈິ່ງມີຄວາມສຳຄັນຫຼາຍທີ່ຈະຊອກຮູ້ວ່າມີຫຍັງຜິດປົກກະຕິ ຫຼື ບໍ່ກ່ຽວກັບການຮັບຮູ້ທາງຫູຂອງເດັກ.