Hesperian Health Guides
ການເຂົ້າໂຮງຮຽນແມ່ນສິ່ງສຳຄັນສຳລັບເດັກຫູໜວກ
ຂໍ້ມູນສຸຂະພາບ > ການຊ່ວຍເຫຼືອເດັກນ້ອຍຫູໜອກ > ບົດທີ 12: ການສຶກສາ > ການເຂົ້າໂຮງຮຽນແມ່ນສິ່ງສຳຄັນສຳລັບເດັກຫູໜວກ
ຢູ່ທີ່ໂຮງຮຽນ, ເດັກຮຽນຮູ້ການອ່ານ ແລະ ຂຽນການອ່ານ ແລະ ຂຽນແມ່ນວິທີ ທີ່ເດັກຫູໜວກສາ ມາດສື່ສານກັບເດັກຄົນອື່ນທີ່ບໍ່ຮູ້ພາສາມື ແລະ ບໍ່ເຂົ້າໃຈຄຳເວົ້າຂອງພວກເຂົາ. ການອ່ານເຮັດໃຫ້ເດັກທີ່ມີບັນຫາໃນການໄດ້ຍິນ ເຂົ້າໃຈແນວຄິດ, ອາລົມ ແລະ ປະສົບປະການຂອງຄົນອື່ນ. ການຂຽນຊ່ວຍໃຫ້ພວກເຂົາສື່ສານ ແລະ ແລກປ່ຽນຄວາມຄິດເຫັນ ຄວາມຮູ້ສຶກກັບຄົນອື່ນ.
ເປັນສິ່ງທີ່ຍາກຍິ່ງຂຶ້ນທີ່ເດັກຍິງຫູໜວກຈະໄດ້ຮັບການສຶກສາ. ເດັກຍິງທີ່ມີບັນຫາໃນການໄດ້ຍິນສ່ວນຫຼາຍແມ່ນຖືກປະໃຫ້ຢູ່ແຕ່ໃນເຮືອນ ເພື່ອເຮັດວຽກເຮືອນ. ເຖິງແມ່ນວ່າຫຼັງຈາກອ້າຍເອື້ອຍຂອງນາງໄປ ໂຮງຮຽນ ຫຼື ແຕ່ງດອງແລ້ວກໍ່ຕາມ.
ເປັນຫຍັງເດັກຍິງຫູໜວກຈຳເປັນຕ້ອງໄດ້ຮູ້ກ່ຽວກັບໂລກພາຍນອກ? ເດັກຍິງຫູໜວກຕ້ອງໄດ້ຮຽນຮູ້ບັນດາທັກສະຕ່າງໆ ເພື່ອຊ່ວຍເຂົາຢູ່ຢ່າງປອດໄພ ແລະ ເຂົ້າຮ່ວມໃນຊຸມຊົນໄດ້. ເຂົາຄວນຮັບຮູ້ກ່ຽວກັບສິດທິຂອງເຂົາ, ໄດ້ຮຽນຮູ້ທັກສະເພື່ອປະກອບອາຊີບ ແລະ ດຳລົງຊີວິດ ຢ່າງເປັນເຈົ້າຕົນເອງ.
ຖ້າປາສະຈາກການສື່ສານ ແລະ ການສຶກສາ, ເດັກຍິງຫູໜວກບໍ່ສາມາດຮຽນຮູ້ກ່ຽວກັບລະບຽບຂອງສັງຄົມ ຫຼື ເຂົ້າໃຈການປ່ຽນແປງທາງຮ່າງກາຍຂອງຕົນ. ເດັກຍິງຫູໜວກຫຼາຍຄົນຖືພາໂດຍບໍ່ເຂົ້າໃຈວ່າມັນເກີດຂຶ້ນໄດ້ແນວໃດ ແລະ ຍ້ອນຫຍັງ. ໃນບາງຂົງເຂດຢູ່ໃນໂລກ, ແມ່ຍິງຫູໜວກຕິດເຊື້ອເອດ (HIV/AIDS) ຫຼາຍກວ່າແມ່ຍິງທົ່ວໄປ ຍ້ອນວ່າພວກເຂົາບໍ່ມີຫົນທາງຮັບເອົາຂໍ້ມູນຂ່າວສານ ເພື່ອປ້ອງກັນຕົນເອງໃຫ້ປອດໄພ.