ໂຮງຮຽນປະເພດຕ່າງໆ ສຳລັບເດັກຫູໜວກ

ເດັກນ້ອຍຫູໜວກ ຫຼື ມີບັນຫາໃນການຟັງ ສາມາດໄປໂຮງຮຽນ ແລະ ຮຽນໃຫ້ຫລາຍ ຮຽນຮູ້ທັກສະ ເພື່ອຈະຫາລ້ຽງຊີບ ເຂົາສາມາດຮຽນໃນຫ້ອງຮຽນປົກກະຕິ ພ້ອມກັບເດັກທົ່ວໄປ ຫຼື ແຍກອອກໄປຮຽນກັບ ເດັກຫູໜວກດ້ວຍກັນ.

ເຖິງແມ່ນວ່າ ທ່ານອາດບໍ່ມີທາງເລືອກຫຼາຍ ໃນການເລືອກປະເພດຂອງໂຮງຮຽນທີ່ຈະສົ່ງ ລູກຂອງ ທ່ານເຂົ້າຮຽນ, ການຮູ້ຈັກກ່ຽວກັບໂຮງຮຽນ ແມ່ນມີຄວາມສຳຄັນ ເພາະວ່າ:

ມັນຊ່ວຍໃຫ້ທ່ານໄດ້ຄົ້ນຄິດຫາສິ່ງທີ່ດີສຸດ ສຳລັບລູກຂອງທ່ານ.
ມັນຊ່ວຍໃຫ້ທ່ານເຮັດວຽກສົມທົບກັບໂຮງຮຽນເພື່ອເຮັດໃຫ້ໂຮງຮຽນຫຼັງນັ້ນດີຂຶ້ນສຳລັບເດັກຫູ ໜວກ.
ຊ່ວຍໃຫ້ທ່ານໄດ້ເຮັດວຽກກັບຊຸມຊົນ ເພື່ອເຮັດໃຫ້ມີໂຮງຮຽນສຳລັບຄົນຫູໜວກຕາມທີ່ບັນດາພໍ່ແມ່ ປາຖະໜາ.

ພິມພາໃຫຍ່ພໍທີ່ ຈະເຂົ້າໂຮງຮຽນໄດ້ ໃນປີໜ້າ, ແຕ່ ຂ້ອຍບໍ່ຮູ້ວ່າໂຮງ ຮຽນປະເພດໃດທີ່ ເໝາະສົມກັບລາວ.

ລູກຂອງເອື້ອຍຂ້ອຍເຂົ້າໂຮງຮຽນ ກິນນອນສຳລັບເດັກຫູໜວກ. ຖ້າ ເທື່ອໜ້າເອື້ອຍຂ້ອຍມາ ໃຫ້ເຈົ້າ ຖາມລາວກ່ຽວກັບເລື່ອງນີ້ເດີ.

ຫຼື ໃຫ້ພິມພາໄປເຂົ້າໂຮງຮຽນຂອງ ເມືອງກໍ່ໄດ້. ເຂົາມີສິດທີ່ຈະເຂົ້າຮຽນ ຢູ່ທີ່ນັ້ນຄືກັບເດັກຄົນອື່ນໆ.

ແຕ່ພວກເຮົາຕ້ອງໝັ້ນ ໃຈກ່ອນວ່າ ອາຈານຢູ່ທີ່ ນັ້ນຮູ້ວິທີສອນເດັກ ນ້ອຍຫູໜວກ.

ໂຮງຮຽນ ແລະ ພາສາ

ໂດຍປົກກະຕິແລ້ວ ໂຮງຮຽນທີ່ສອນເດັກຫູໜວກ ຈະເອົາໃຈໃສ່ສອນພາສາປະເພດໃດໜຶ່ງອາດຈະ ແມ່ນພາສາເວົ້າ (ສຳລັບຄົນຫູໜວກ) ຫຼື ພາສາມື. ໂຮງຮຽນບາງແຫ່ງສອນໃຫ້ເດັກເວົ້າ ແລະ ໃຊ້ພາສາມືໃນເວລາດຽວກັນ ຫຼື ເວົ້າໄປພ້ອມກັບການໃຊ້ນິ້ວມືສະກິດຄຳເວົ້າ. ພວກເຂົາໝູນໃຊ້ ພາສາມື. ທ່າທາງ, ຮູບພາບ, ການອ່ານຮີມສົບ, ສຽງເວົ້າ, ພ້ອມທັງການອ່ານ ແລະ ຂຽນ.

ໂດຍທົ່ວໄປ ຄູທີ່ໃຊ້ພາສາເວົ້າ ແລະ ຄູຜູ້ໃຊ້ພາສາມື ແມ່ນມັກບໍ່ເຫັນພ້ອມນຳກັນກ່ຽວກັບຮູບແບບຂອງອີກຝ່າຍໜຶ່ງ. ນີ້ເຮັດໃຫ້ເປັນເລື່ອງຫຍຸ້ງຍາກຫຼາຍສຳລັບພໍ່ແມ່ ໃນການຊອກຂ້ໍມູນວ່າຈຸດໃດແດ່ທີ່ເປັນຈຸດດີຂອງພາສາແຕ່ລະຮູບແບບ. ເບິ່ງຂໍ້ມູນເພີ່ມຕື່ມໄດ້ໃນບົດທີ7,ບົດທີ8ແລະບົດທີ9.

ໂຮງຮຽນຂອງພວກເຮົາເຊື່ອວ່າ ເດັກຫູໜວກມີ ສິດທີ່ຈະຮຽນພາສາມື ເພາະມັນເປັນພາສາ ທຳມະຊາດຂອງຄົນຫູໜວກ.

ພວກເຮົາຍັງສອນກ່ຽວກັບປະຫວັດສາດ ແລະ ສິ່ງສຳຄັນອື່ນໆ ສຳລັບຄົນຫູໜວກ ແລະ ຊຸມຊົນຄົນຫູໜວກ.

ໂຮງຮຽນຂອງພວກເຮົາເຊື່ອວ່າ ມີແຕ່ເດັກຫູ ໜວກທີ່ສາມາດເຂົ້າໃຈ ແລະ ຕອບຄືນພາສາ ເວົ້າເທົ່ານັ້ນ ຈິ່ງຈະສາມາດປະສົບຜົນສຳເລັດ ໃນການດຳລົງຊີວິດ.

ເດັກຫູໜວກ ສາມາດຮຽນຮ່ວມຫ້ອງກັບເດັກຫູດີ

ການສິດສອນເດັກຫູໜວກ ແລະ ເດັກຫູດີໃນຫ້ອງດຽວກັນ ແມ່ນມັກເປັນວິທີທີ່ຊຸມຊົນ ໝູນໃຊ້ ເພື່ອສື່ສານກັບເດັກຫູໜວກ. ເດັກທີ່ໄດ້ຍິນປົກກະຕິອາດກວນ ຫຼື ເຮັດເມີນເສີຍບໍ່ສົນໃຈເດັກຫູໜວກ ຍ້ອນວ່າ ເດັກຫູໜວກມີລັກສະນະການເວົ້າທີ່ແຕກຕ່າງ ຫຼື ຍ້ອນວ່າພວກເຂົາບໍ່ເຂົ້າໃຈວ່າຄົນອື່ນເວົ້າຫຍັງ. ແຕ່ຖ້າຄົນອ້ອມຂ້າງຫາກຢຸດເຊົາພຶດຕິກຳທີ່ທຳຮ້າຍຄວາມຮູ້ສຶກຂອງເດັກດັ່ງກ່າວແລ້ວ, ເດັກຫູໜວກຈະມີໂອກາດໃນການສ້າງເພື່ອນມິດກັບເດັກຫູດີ ແລະ ກາຍເປັນພາກສ່ວນໜຶ່ງຂອງຊຸມຊົນແຫ່ງນັ້ນໄດ້.

ພວກເຮົາທັງເດັກຫູໜວກ ແລະ ຫູດີບໍ່ຕ້ອງການຖືກແຍກຈາກ ກັນ, ເພາະພວກເຮົາອາດສູນ ເສຍເພື່ອນທີ່ດີໄປ.

ພວກເຮົາຊ່ວຍໃຫ້ເດັກທີ່ບໍ່ ສາມາດໄດ້ຍິນ ໄດ້ເຫັນໃນ ສິ່ງທີ່ພວກເຂົາຄວນຮູ້.

ພວກເຮົາເອົາເຂົາເຈົ້າໃສ່ລ້ໍ ຊຸກ ເມື່ອເຂົາເຈົ້າຕ້ອງ ການຄວາມຊ່ວຍເຫຼືອ.

ພວກເຮົາໃຫ້ກັນຍືມສິ່ງຂອງ ເມື່ອຜູ້ໃດຜູ້ໜຶ່ງລືມ.

ເມື່ອເດັກດຳລົງຊີວິດຮ່ວມກັບຄົນອື່ນໆ ພວກເຂົາຮຽນຮູ້ທີ່ຈະຍອມຮັບຈຸດ ແຂງຂອງຄົນອື່ນ ແລະ ສະໜັບສະໜູນຊ່ວຍເຫຼືອເຊິ່ງກັນ ແລະ ກັນ.

ໂຮງຮຽນບາງແຫ່ງສອນພາສາມືໃຫ້ນັກຮຽນທຸກຄົນເພື່ອບໍ່ໃຫ້ເດັກຫູໜວກຖືກປ່ອຍໃຫ້ໂດດດ່ຽວ. ຫຼືໃນໄລຍະເວລາພິເສດພວກເຂົາກໍ່ສອນໃຫ້ເດັກທີ່ມີບັນຫາໃນການໄດ້ຍິນໃຫ້ຮຽນເວົ້າ

ຄຸນປະໂຫຍດຂອງການຮຽນຮ່ວມກັບເດັກຫູດີ

ເດັກຫູໜວກສາມາດສືບຕໍ່ດຳລົງຊີວິດຢູ່ເຮືອນຮ່ວມກັບຄອບຄົວຂອງພວກເຂົາ.
ໂດຍທົ່ວໄປແມ່ນບໍ່ມີລາຍຈ່າຍສິ້ນເປືອງຫຼາຍ.

ຂ້ໍຫຍຸ້ງຍາກຂອງການຮຽນຮ່ວມກັບເດັກຫູດີ

ເດັກຫູດີ ອາດກໍ່ກວນ ຫຼື ເຮັດເມີນເສີຍບໍ່ສົນໃຈເດັກຫູໜວກ.
ບັນດາອາຈານ ອາດບໍ່ມີຄວາມຮູ້ກ່ຽວກັບເດັກຫູໜວກ ຫຼື ບໍ່ຮູ້ວິທີສິດສອນເດັກທີ່ມີຄວາມສາມາດໃນການໄດ້ຍິນແຕກຕ່າງກັນ.
ຄົນທີ່ຮູ້ພາສາມືດີ ອາດມີຈຳນວນໜ້ອຍ. ເຊິ່ງຈະເຮັດໃຫ້ພັດທະນາການທາງດ້ານຈິດໃຈຂອງເດັກໄດ້ຮັບຜົນກະທົບ.

ວິທີສະໜັບສະໜູນໃຫ້ເດັກຫູໜວກຮຽນໃນຫ້ອງຮຽນກັບເດັກຫູດີ

ພຽງແຕ່ການເປີດປະຕູໂຮງຮຽນໃຫ້ແກ່ເດັກຫູໜວກ ແມ່ນຍັງບໍ່ພຽງພໍ. ເດັກຫູໜວກທີ່ຮຽນໃນຫ້ອງຮຽນປົກກະຕິຮ່ວມກັບເດັກຫູດີ ຕ້ອງການອາຈານ ແລະ ເພື່ອນຮ່ວມຫ້ອງທີ່ສາມາດ ສື່ສານກັບເຂົາໄດ້. ບົດຮຽນຄວນຖືກສອນໃນຮູບແບບທີ່ເດັກຫູໜວກສາມາດເຂົ້າໃຈ ເພາະວ່າ ຖ້າເດັກບໍ່ເຂົ້າໃຈເຂົາກໍ່ຈະບໍ່ຢາກຮຽນ.

ຖ້າໂຮງຮຽນບໍ່ເອົາໃຈໃສ່ເດັກຫູໜວກຢ່າງພຽງພໍ, ພວກເຂົາຈະບໍ່ສາມາດຮຽນຮູ້ໄດ້ເໝືອນກັບເດັກຫູ ດີຜູ້ອື່ນ. ຖ້າທາງໂຮງຮຽນຄາດຫວັງໃນຄວາມສາມາດຂອງເດັກຕ່ຳ, ໃຫ້ເດັກຫູໜວກຮຽນໜ້ອຍກວ່າເດັກຄົນອື່ນໆ ນີ້ກໍ່ເປັນຄວາມຄິດທີ່ບໍ່ຖືກຕ້ອງ ແລະ ເປັນຜົນຮ້າຍຕໍ່ໝົດທຸກຄົນ.

ສະເໜີການຝຶກອົບຮົມເພີ່ມເຕີມສຳລັບອາຈານເພື່ອໃຫ້ພວກເຂົາສາມາດສື່ສານກັບເດັກຫູໜວກ

ຄູອາຈານທີ່ບໍ່ເຄີຍເຮັດວຽກກັບເດັກຫູໜວກ ຫຼື ກັບເດັກທີ່ມີບັນຫາໃນການໄດ້ຍິນ ອາດບໍ່ມີຄວາມໝັ້ນໃຈກ່ຽວກັບວິທີສິດສອນພວກເຂົາ. ໃຫ້ແນະນຳອາຈານກ່ຽວກັບຄວາມຕ້ອງການ ແລະ ຄວາມສາມາດຂອງເດັກ ແລະ ແນະນຳວິທີງ່າຍດາຍຕ່າງໆ ເພື່ອເຮັດໃຫ້ການຮຽນຂອງເດັກງ່າຍຂຶ້ນ.

ອາລີ ມັກເບິ່ງແຜ່ນໂຄສະນາ, ຮູບພາບ ແລະ ຫຸ່ນ. ລາວຮຽນຮູ້ໂດຍຜ່ານການເບິ່ງ ແຕ່ລາວກໍ່ສາມາດໄດ້ຍິນຢູ່ໜ້ອຍໜຶ່ງ.

ພວກເຮົາຈະພະ ຍາຍາມສຸດຂີດ ເພື່ອເຮັດໃຫ້ ອາລີ ຮ່ວມເຮັດ ກິດຈະກຳຂອງຫ້ອງໃຫ້ໄດ້.

ຖ້າເດັກສາມາດໄດ້ຍິນຢູ່ໜ້ອຍໜຶ່ງ ແລະ ຮູ້ອ່ານຮີມສົບ, ອາຈານຄວນຫັນໜ້າໃສ່ເດັກເມື່ອເວລາເວົ້າ ແລະ ເຮັດໃຫ້ເດັກເຫັນສົບທຸກຄັ້ງ.

ໃຫ້ເດັກຫູໜວກນັ່ງຢູ່ໃກ້ໆກັບອາຈານ. ເພື່ອໃຫ້ເດັກສາມາດສັງເກດເຫັນການເໜັງຕີງຂອງຮີມສົບ. ລາວຈິ່ງຈະບໍ່ຖືກລົບກວນຈາກການເຄື່ອນເໜັງຂອງເດັກຄົນອື່ນໃນຫ້ອງ.

ຊ່ວຍໃຫ້ໂຮງຮຽນສາມາດສະໜອງຄວາມຕ້ອງການຂອງເດັກຫູໜວກ

ແລະ ນັກຮຽນຄົນອື່ນໆໃຫ້ເຂົ້າໃຈກ່ຽວ ກັບຄົນຫູໜວກ ແລະ ວິທີຮຽນ ໂດຍຜ່ານການສັງເກດ, ການເບິ່ງຂອງເດັກຫູໜວກ ເຊິ່ງຈະຊ່ວຍໃຫ້ທຸກຄົນໃນໂຮງຮຽນກຽມພ້ອມເພື່ອຕ້ອນຮັບພວກເຂົາ.
ຜູ້ໃຫຍ່ຫູໜວກ ສາມາດຊ່ວຍສອນພາສາມືໃຫ້ແກ່ນັກຮຽນ ແລະ ອາຈານ. ພວກເຂົາສາມາດຊ່ວຍອາຈານໂດຍການຮ່ວມໃນໂມງຮຽນ ເພື່ອໃຫ້ຄວາມສົນໃຈພິເສດຕື່ມແກ່ເດັກຫູໜວກ.

ເນື່ອງຈາກເດັກຫູໜວກ ຫຼື ເດັກທີ່ມີບັນຫາໃນການໄດ້ຍິນຕ້ອງໄດ້ຮຽນຮູ້ໂດຍຜ່ານການເບິ່ງ. ສະນັ້ນ ທາງໂຮງຮຽນຄວນຊ່ວຍໃຫ້ພວກເຂົາໄດ້ຮັບການກວດສອບສາຍຕາ ແລະ ໄດ້ໃສ່ແວ່ນຕາຖ້າວ່າຈຳເປັນ.

ພໍ່ແມ່ຂອງເດັກຄວນໄດ້ພົບປະກັບອາຈານທີ່ສອນ ເພື່ອສອບຖາມຂ້ໍມູນກ່ຽວກັບສິ່ງທີ່ເດັກຮຽນ ແລະ ວິທີທີ່ເຂົາກຳລັງຮຽນ. ເຊິ່ງຈະຊ່ວຍໃຫ້ພໍ່ແມ່ສາມາດເສີມສ້າງຕື່ມສິ່ງທີ່ເດັກກຳລັງຮຽນຢູ່ໂຮງຮຽນ. ພໍ່ແມ່ເອງ ກໍ່ສາມາດແລກປ່ຽນໃຫ້ອາຈານຮູ້ສິ່ງທີ່ເດັກເຮັດເມື່ອຢູ່ເຮືອນ.

ເຊິ່ງຈະເຮັດໃຫ້ອາຈານສາມາດນຳເອົາສິ່ງຕ່າງໆຈາກປະສົບການຂອງເດັກ ເພື່ອສອດເຂົ້າໃສ່ໃນບົດຮຽນຂອງເຂົາ.

ເດັກຫູໜວກສາມາດຮຽນໃນກຸ່ມຂອງພວກເຂົາ

ເດັກຫູໜວກ ຫຼື ເດັກທີ່ມີບັນຫາໃນການໄດ້ຍິນ ສາມາດຮຽນໃນຫ້ອງຮຽນທີ່ແຍກຕ່າງຫາກ ສຳລັບພວກເຂົາໃນໂຮງຮຽນທ້ອງຖິ່ນ ຫຼື ໃນໂຮງຮຽນທີ່ມີການແຍກວັນ ຫຼື ໃນໂຮງຮຽນກິນນອນ.

ມີໂຮງຮຽນທີ່ແຍກສະເພາະ ເພື່ອການສຶກສາຮ່ຳຮຽນສຳລັບເດັກຫູໜວກ ຫຼື ເດັກທີ່ມີບັນຫາໃນການໄດ້ຍິນ.

ສຳລັບເດັກເຫຼົ່ານີ້ ໃນການຮ່ຳຮຽນໃນຫ້ອງຮຽນ ຫຼື ໂຮງຮຽນລັກສະນະນີ້. ການນຳເອົາເດັກຫູໜວກມາຢູ່ຮ່ວມກັນໃນຫ້ອງຮຽນ ຫຼື ໂຮງຮຽນເຮັດໃຫ້ ພວກເຂົາມີສັງຄົມຂອງພວກເຂົາເອງ, ບໍ່ດັ່ງນັ້ນພວກເຂົາອາດຖືກປ່ອຍໃຫ້ຢູ່ຢ່າງໂດດດ່ຽວ.

ເມື່ອເດັກໄດ້ເຂົ້າໂຮງຮຽນເຫຼົ່ານີ້. ເດັກຈະໄດ້ຮຽນພາສາມື. ສະມາຊິກໃນຄອບຄົວຄົນອື່ນໆກໍ່ສາ ມາດສື່ສານກັບເດັກໄດ້ດີຂຶ້ນຖ້າພວກເຂົາຫາກຮຽນພາສາມືຄືກັນ.

ໂຮງຮຽນກິນນອນ

ເດັກຫູໜວກພັກຢູ່ໃນໂຮງຮງເຫຼົ່ານີ້ ແລະ ກັບຄືນບ້ານໃນທ້າຍອາທິດ ແລະ ໃນວັນພັກຕ່າງໆ. ເດັກທີ່ພັກຢູ່ໂຮງຮຽນກິນນອນສ່ວນຫຼາຍ ແມ່ນໄດ້ຮຽນທັກສະສຳລັບການເຮັດວຽກເຊັ່ນ: ຄອມພິວເຕີ, ກົນຈັກ, ສິລະປະ ແລະ ງານຟາມ ລວມໄປເຖິງການອ່ານການຂຽນ ແລະ ວິຊາເລກ.

ແລະ ໃຜສາມາດ ບອກອາຈານໄດ້ ແດ່ວ່າ 12x12 ເປັນເທົ່າໃດ?

ຂ້ອຍບໍ່ສາມາດຈື່ມັນ ໄດ້ໝົດດອກ!

ມານັ່ງກັບພວກເຮົາຕອນກິນ ເຂົ້າທ່ຽງ, ພວກເຮົາຈະອະທິ ບາຍໃຫ້ເຈົ້າດອກ.

ບາງຄັ້ງຄອບຄົວຂອງເດັກຫູໜວກກໍ່ມີຄວາມກັງວົນເມື່ອເດັກຕ້ອງໄດ້ຢູ່ໄກບ້ານ. ການສື່ສານກັບຄອບຄົວຂອງເດັກຜູ້ອື່ນໆ, ການໄປຢ້ຽມຢາມເດັກທີ່ໂຮງຮຽນ, ພົບປະກັບເພື່ອນ ແລະ ຄູອາຈານຂອງເດັກສາມາດຊ່ວຍໃຫ້ ພໍ່ແມ່ຫຼຸດຜ່ອນຄວາມຮູ້ສຶກກັງວົນລົງໄດ້ ເມື່ອລູກຂອງພວກເຂົາຕ້ອງຈາກບ້ານເພື່ອເຂົ້າຮຽນໃນໂຮງຮຽນກິນນອນ.

ຢູ່ທີ່ໂຮງຮຽນກິນນອນ ກໍ່ເໝືອນກັບສະຖານທີ່ອື່ນໆເຊິ່ງມີໂອກາດທີ່ເດັກຈະຖືກລະເມີດ ພໍ່ແມ່ຕ້ອງກະຕຸ້ນໃຫ້ລູກທີ່ເຂົ້າໂຮງຮຽນກິນນອນ ບອກ ຫຼື ສື່ສານກ່ຽວກັບບັນຫາຂອງພວກເຂົາກັບອາຈານ, ພໍ່ຮັກແມ່ຮັກ ແລະ ຄົນອື່ນໆ. ເບິ່ງຂໍ້ມູນເພີ່ມຕື່ມໄດ້ໃນບົດທີ13.

ເດັກຫູໜວກທ່ີເຂົ້າຮຽນໃນໂຮງຮຽນກິນນອນ ສ່ວນຫຼາຍແມ່ນໄດ້ຮັບປະສົບການທີ່ດີ. ເຖິງຈະຄິດຮອດບ້ານ, ໂຮງຮຽນໄດ້ໃຫ້ໂອກາດພວກເຂົາໃນການພົວພັນກັບກຸ່ມຄົນທີ່ກວ້າງອອກ ເດັກຫູໜວກໄດ້ສ້າງສາຍສຳພັນອັນສະໜິດສະໜົມກັບເດັກຄົນອື່ນ ແລະ ພະນັກງານທີ່ຢູ່ໃນໂຮງຮຽນ.

ວັນເຂົ້າໂຮງຮຽນສະເພາະເດັກຫູໜວກ

ເດັກໄປໂຮງຮຽນໃນວັນທີ່ສອນສະເພາະເດັກ ຫູໜວກ. ເດັກຍັງພັກຢູ່ເຮືອນນຳຄອບຄົວຂອງພວກເຂົາ ແລະ ສືບຕໍ່ການພົວພັນກັບເດັກຫູດີ ແລະ ຜູ້ໃຫຍ່ຢູ່ທີ່ຊຸມຊົນຂອງພວກເຂົາ.

ຫ້ອງຮຽນສະເພາະສຳລັບເດັກຫູໜວກໃນໂຮງຮຽນທ້ອງຖິ່ນ

ໃນໂຮງຮຽນບາງແຫ່ງ, ເດັກຫູໜວກໃຊ້ເວລາໝົດມື້ຢູ່ໃນຫ້ອງຮຽນທີ່ແຍກຕ່າງຫາກ ແລະ ມີໂອກາດ ພົບກັບເດັກຫູດີ ແຕ່ໃນໄລຍະພັກຂັ້ນຊົ່ວໂມງ. ໃນບາງໂຮງຮຽນນັກຮຽນຫູໜວກໃຊ້ເວລາຕອນໃດຕອນໜຶ່ງໃນຫ້ອງຮຽນຮ່ວມກັບເດັກຫູດີ, ເພື່ອຮຽນສິລະປະ ແລະ ເຮັດບົດຝຶກຫັນ. ອາຍຸ ແລະ ຄວາມສາມາດຂອງເດັກແຕ່ລະຄົນໃນຫ້ອງຮຽນພິເສດ ນີ້ແມ່ນແຕກຕ່າງກັນ.

ຄຸນປະໂຫຍດຂອງການຮຽນນຳແຕ່ເດັກຫູໜວກ

ຫ້ອງຮຽນ ແລະ ໂຮງຮຽນສຳລັບເດັກຫູໜວກ ມີຄູອາຈານທີ່ໄດ້ຮັບການຝຶກອົບຮົມເປັນພິເສດ ສຳລັບການສິດສອນເດັກຫູໜວກ. ໂດຍທົ່ວໄປ ອາຈານເຫຼົ່ານີ້ແມ່ນສາມາດຕອບສະໜອງຕາມຄວາມຕ້ອງການຂອງເດັກ ແລະ ເອົາໃຈໃສ່ເດັກແຕ່ລະຄົນ.
ເດັກຫູໜວກຮູ້ສຶກໂດດດ່ຽວໜ້ອຍລົງ ເມື່ອພວກເຂົາສາມາດສື່ສານກັບຄົນອື່ນ ຢູ່ອ້ອມຂ້າງໄດ້ທັງໝົດ.

ເດັກຫູໜວກມີໂອກາດຫຼິ້ນ, ຮຽນ, ພັດທະນາທັກສະທາງສັງຄົມ ແລະ ສ້າງເພື່ອນມິດ.
ເດັກສາມາດພົບປະ ແລະ ພົວພັນກັບຜູ້ໃຫຍ່ຫູໜວກ ທີ່ເຮັດວຽກຢູ່ໂຮງຮຽນແຫ່ງນັ້ນ.
ຫ້ອງຮຽນ ຫຼື ໂຮງຮຽນສຳລັບເດັກຫູໜວກບາງແຫ່ງ ຊ່ວຍໃຫ້ເດັກໄດ້ຮັບການກວດສອບການໄດ້ຍິນ ແລະ ໃສ່ເຄື່ອງຊ່ວຍຟັງ.

ຂ້ໍຫຍຸ້ງຍາກຂອງການຮຽນນຳແຕ່ເດັກຫູໜວກ

ເດັກຫູໜວກທີ່ຮຽນໃນໂຮງຮຽນທີ່ແຍກຕ່າງຫາກອາດບໍ່ສາມາດຮຽນຮູ້ວິທີດຳລົງຊີວິດ ແລະ ການພົວພັນຢ່າງສະດວກສະບາຍກັບຄົນອື່ນໆໃນໂລກທີ່ຄົນອື່ນສາມາດໄດ້ຍິນ.
ໂຮງຮຽນອາດຕັ້ງຢູ່ໄກ ແລະ ມີລາຍຈ່າຍສູງ.
ໃນຫ້ອງຮຽນອາດປະກອບມີເດັກທີ່ມີເກນອາຍຸທີ່ແຕກຕ່າງກັນ. ຈຶ່ງອາດສ້າງຄວາມຫຍຸ້ງຍາກໃຫ້ແກ່ອາຈານ ໃນການສະໜອງຕາມຄວາມຕ້ອງການໃຫ້ເດັກທຸກໆຄົນທີ່ແຕກຕ່າງກັນ.

←→ ໜ້າກ່ອນ | ໜ້າຕໍ່ໄປ →←

Hesperian Health Guides

ໂຮງຮຽນປະເພດຕ່າງໆ ສຳລັບເດັກຫູໜວກ

ເປັນພາສາອື່ນໆ