Hesperian Health Guides
ການກະກຽມ ແລະ ການເກັບມ້ຽນອາຫານ
ຂໍ້ມູນສຸຂະພາບ > ປຶ້ມຢູ່ໄກແພດສະບັບປັບປຸງໃໝ່ > ນໍ້າ ແລະ ສຸຂະນາໄມ ປັດໄຈສຳຄັນຂອງການມີສຸຂະພາບທີ່ດີ > ການກະກຽມ ແລະ ການເກັບມ້ຽນອາຫານ
ການເຈັບເປັນແມ່ນສາມາດເກີດຈາກເຊື້ອພະຍາດ ແລະແມ່ທ້ອງທີ່ເຂົ້າໄປໃນຮ່າງກາຍ ຂອງຄົນເຮົາ ໂດຍຜ່ານທາງອາຫານທີ່ເຮົາກິນເຂົ້າໄປ. ເພື່ອຫຼີກເວັ້ນການເຈັບເປັນຈາກອາຫານທີ່ບໍ່ສະອາດນັ້ນ ແມ່ນໃຫ້:
- ລ້າງມືໃຫ້ສະອາດກ່ອນກິນອາຫານ ຫຼືກ່ອນແຕ່ງອາຫານ.
- ລ້າງ ຫຼືປອກໝາກໄມ້ ແລະຜັກຕ່າງໆ ຫຼືປຸງແຕ່ງພວກມັນໃຫ້ສຸກດີກ່ອນຈິ່ງກິນ. ການເຮັດເຊັ່ນນີ້ຈະຂ້າເຊື້ອພະຍາດຈາກດິນທີ່ຕິດມານຳຜັກ ແລະຂ້າເຊື້ອພະຍາດທີ່ຕິດມາໃນລະຫວ່າງການຂົນສົ່ງ.
- ປຸງແຕ່ງອາຫານປະເພດຊີ້ນໃຫ້ສຸກດີກ່ອນກິນ. ລ້າງຂຽງ, ອຸປະກອນເຄື່ອງໃຊ້ ແລະພື້ນຜິວໜ້າບ່ອນທີ່ໃຊ້ກະກຽມປຸງແຕ່ງອາຫານປະເພດຊີ້ນໃຫ້ສະອາດຫຼັງຈາກແຕ່ງກິນແລ້ວ ເພື່ອປ້ອງກັນບໍ່ໃຫ້ເຊື້ອພະຍາດຈາກຊີ້ນດິບ, ອາຫານທະເລ, ໄຂ່ ແຜ່ກະຈາຍໄປເປື້ອນໃນອາຫານທີ່ປຸງແຕ່ງແລ້ວ ຫຼືອາຫານທີ່ເຈົ້າຈະກິນດິບ.
- ກິນອາຫານທັນທີທີ່ແຕ່ງແລ້ວໃໝ່ໆ ຫຼືເກັບອາຫານທີ່ແຕ່ງແລ້ວນັ້ນໄວ້ກິນຕາມຫຼັງ ໂດຍໃຊ້ຝາງວມໄວ້ ເພື່ອປ້ອງກັນບໍ່ໃຫ້ແມງວັນຕອມ ແລະສິ່ງເປື້ອນເປີຖືກອາຫານນັ້ນ.
- ໃຫ້ອຸ່ນອາຫານທີ່ຊື້ມາຈາກຂ້າງນອກບ້ານ ຫຼືອາຫານເກົ່າທີ່ແບ່ງໄວ້ນັ້ນໃຫ້ຮ້ອນດີ ແລ້ວຈິ່ງກິນ. ການເຮັດເຊັ່ນ ນີ້ຈະເປັນການຂ້າເຊື້ອພະຍາດຕ່າງໆໄດ້.
- ເກັບອາຫານໄວ້ໃຫ້ປອດໄພຈາກແມງວັນ ແລະພວກໜູຕ່າງໆ ທີ່ສາມາດແຜ່ເຊື້ອພະຍາດໄດ້.
- ຮັກສາຄວາມສະອາດໃນສະຖານທີ່ແຕ່ງກິນໃຫ້ສະອາດ, ລ້າງຖ້ວຍບ່ວງຈານຊາມ, ຂຽງ ແລະອຸປະກອນ ແຕ່ງກິນຕ່າງໆ ຫຼັງແຕ່ງກິນແລ້ວແຕ່ລະຄັ້ງ ແລະເຮັດໃຫ້ພວກມັນແຫ້ງດີ.
- ນຳເອົາເສດອາຫານທີ່ກິນເຫຼືອໄປເກືອສັດລ້ຽງ ຫຼືເອົາຖິ້ມໃສ່ຂຸມໝັກບົ່ມຝຸ່ນ ເພື່ອຈະບໍ່ໃຫ້ເສດອາຫານເຫຼົ່ານີ້ເປັນທີ່ດຶງດູດແມງວັນແມງມີ່ມາຕອມ.
- ເກັບຮັກສາອາຫານໄວ້ໃນອຸ່ນນະພູມທີ່ເຢັນ ຊຶ່ງຈະເປັນການຊ່ວຍປ້ອງກັນບໍ່ໃຫ້ອາຫານບູດເນົ່າໄວ.
ເຮັດຕູ້ເຢັນແບບງ່າຍດາຍໂດຍໃຊ້ໝໍ້ດິນທີ່ບໍ່ໄດ້ເຄືອບເງົາສອງໜ່ວຍ ທີ່ມີຂະໜາດແຕກຕ່າງກັນ. ເອົາໝໍ້ໜ່ວຍນ້ອຍໃສ່ຊ້ອນເຂົ້າໄປໃນໝໍ້ໃຫຍ່ ແລ້ວຈາກນັ້ນເອົາຂີ້ຊາຍໃສ່ໃນລະຫວ່າງຊ່ອງຫວ່າງຂອງໝໍ້ທັງສອງນັ້ນໃຫ້ແໜ້ນດີ. ໃຫ້ຖອກນ້ຳໃສ່ໃນຊາຍນັ້ນມື້ລະສອງຄັ້ງ ເພື່ອຮັກສາໃຫ້ຊາຍປຽກຊຸ່ມຢູ່ສະເໝີ. ຈາກນັ້ນ ກໍ່ເອົາອາຫານທີ່ເຮົາຢາກເກັບຮັກສາໃສ່ໄວ້ໃນໝໍ້ນ້ອຍນັ້ນ, ແລະອັດປາກໝໍ້ນັ້ນໃຫ້ແຈບດີເພື່ອຮັກສາຄວາມເຢັນ.
ຮັກສາອາຫານບໍ່ໃຫ້ຖືກແມງວັນຕອມ
ແມງວັນແມ່ນເປັນພາຫະນະແຜ່ເຊື້ອພະຍາດ ແລະເປັນສາຍເຫດຂອງການເຈັບເປັນພວກມັນໄປຕອມອາຈົມຂອງຄົນ ແລະສັດ ຈາກນັ້ນມັນກໍ່ໄປຈັບອາຫານທີ່ພວກເຮົາກິນ. ຈົ່ງຮັກສາອາຫານບໍ່ໃຫ້ຖືກແມງວັນຕອມໂດຍເອົາແນວ ປິດກວບອາຫານໄວ້ ຫຼືເຮັດກັບດັກຈັບແມງວັນ ເພື່ອປ້ອງກັນແມງວັນບໍ່ໃຫ້ແຜ່ຜະຍາດໄດ້.
ວິທີເຮັດກັບດັກຈັບແມງວັນ
- ໃຊ້ແຜ່ນກາວ ຫຼືເຈ້ຍກາວເພື່ອເຮັດເປັນແກນຮູບກວຍກົ້ນເປີດ ຈາກນັ້ນນຳເອົາກວຍໃສ່ເຂົ້າໄປໃນຂວດໂຫຼ ຫຼື ກະຕຸກໃຫ້ພໍດີ.
- . ໃຊ້ແນວຕິດປາກກະຕຸກກັບກວຍໃຫ້ແຈບດີເພື່ອບໍ່ໃຫ້ມີຊ່ອງວ່າງລະຫວ່າງກວຍ ແລະປາກກະຕຸກນັ້ນ.
- ຫ້ອຍກະຕຸກດ້ວຍສາຍເຊືອກ ຫຼືມັດຕິດໄວ້ກັບຫຼັກໄມ້ທີ່ປັກຢູ່ກັບພື້ນ.
- ນຳໝາກໄມ້, ອາຫານ ຫຼືເຫຍື່ອອື່ນໆ ໄປວາງໄວ້ກ້ອງກັບດັກດັ່ງກ່າວ, ແມງວັນຈະບິນລົງມາຈັບຕອມອາຫານ ແລະຈາກນັ້ນຈະບິນເຂົ້າໄປໃນກວຍແລ້ວເຂົ້າໄປໃນກະຕຸກ.
- ເພື່ອກຳຈັດເອົາແມງວັນໃນກະຕຸກນັ້ນອອກ ແມ່ນໃຫ້ປີ້ນປາກກະຕຸກນັ້ນຂຶ້ນ, ເອົາກວຍນັ້ນອອກມາ, ຈາກນັ້ນ ກໍ່ຖອກນ້ຳເຂົ້າໄປໃຫ້ເຕັມກະຕຸກເພື່ອໃຫ້ແມງວັນນັ້ນຕາຍ ແລະຈາກນັ້ນກໍ່ຖອກພວກມັນຖິ້ມ.
