Hesperian Health Guides
ຂ້ອຍຈະຮູ້ໄດ້ແນວໃດວ່າລູກຂອງຂ້ອຍຖືກລ່ວງລະເມີດ?
ຂໍ້ມູນສຸຂະພາບ > ການຊ່ວຍເຫຼືອເດັກນ້ອຍຫູໜອກ > ບົດທີ 13: ການປ້ອງກັນການລ່ວງລະເມີດທາງເພດເດັກ > ຂ້ອຍຈະຮູ້ໄດ້ແນວໃດວ່າລູກຂອງຂ້ອຍຖືກລ່ວງລະເມີດ?
ເນື່ອງຈາກວ່າ ເດັກບໍ່ຕ້ອງການສື່ສານກ່ຽວກັບການຖືກລ່ວງລະເມີດ, ທ່ານຈຳຕ້ອງໄດ້ສັງເກດຫາສັນ ຍານທີ່ເປັນໄປໄດ້. ສັນຍານຕໍ່ໄປນີ້ບໍ່ແມ່ນຜົນຈາກການຖືກລ່ວງລະເມີດສະເໝີໄປ ແຕ່ຖ້າສັງເກດມີສັນຍານ ເຫຼົ່ານີ້ ທ່ານຄວນເອົາໃຈໃສ່ ໂດຍສະເພາະ ຖ້າເດັກສະແດງອອກໃນຫຼາຍໆສັນຍານເຫຼົ່ານີ້.
ບາງສັນຍານທາງຮ່າງກາຍລວມມີ:
- ຄວາມເຈັບປວດທີ່ບໍ່ສາມາດອະທິບາຍໄດ້, ຮອຍບວມ, ຮອຍແດງຊ້ໍາ ຫຼື ເລືອດອອກທີ່ປາກ ຫຼື ທີ່ອະໄວຍະວະເພດ ຫຼື ອ້ອມບໍລິເວນທະວານ.
- ສະລິບທີ່ຈີກຂາດ ຫຼື ມີເລືອດ.
- ມີບັນຫາໃນການຖ່າຍເບົາ ຫຼື ຖ່າຍໜັກ ຫຼື ມີເລືອດຕິດໃນນ້ໍາຍ່ຽວ ຫຼື ອາຈົມ.
- ມີສິ່ງຜິດປົກກະຕິອອກຈາກອະໄວຍະວະເພດ ຫຼື ທະວານ ຫຼື ການຕິດເຊື້ອພະຍາດຕິດຕໍ່ທາງເພດ.
- ຮອຍຝົກຊ້ໍາ, ເຈັບຫົວ ຫຼື ການເຈັບທ້ອງນ້ອຍ.
ເດັກທີ່ຖືກລ່ວງລະເມີດທາງເພດອາດຈະ:
- ຢຸດການອາບນ້ໍາ ຫຼື ທຳຄວາມສະອາດຕົນເອງເລື້ອຍໆກວ່າປົກກະຕິ ຫຼື ບໍ່ຍອມຖ່າຍເຄື່ອງ.
- ຫຼິ້ນກັບເດັກຄົນອື່ນ ຫຼື ເຄື່ອງຫຼິ້ນໂດຍມີລັກສະນະທາງເພດ, ໃນລັກສະນະທີ່ຮູ້ຈັກວິທີ ຫຼື ຫຼິ້ນລັກສະ ນະດັ່ງກ່າວເລື້ອຍໆເຊິ່ງບໍ່ເໝາະສົມກັບໄວອາຍຸ.
- ຮູ້ຈັກເລື່ອງເພດຫຼາຍກວ່າເດັກຄົນອື່ນ.
ເດັກທີ່ຕົກເປັນຜູ້ເຄາະຮ້າຍຂອງຄວາມຮຸນແຮງ ແລະ ການລ່ວງລະເມີດທາງເພດອາດຈະ:
- ເບິ່ງຄືຮູ້ສຶກຢ້ານກົວ, ອ່ອນໄຫວ ແລະ ລະແວງ ຫຼື ຢ້ານກົວສະຖານທີ່ ຫຼື ບຸກຄົນໃດໜຶ່ງຢ່າງກະທັນ ຫັນ ຫຼື ຕ້ອງການຢາກຢູ່ນຳແຕ່ພໍ່ແມ່ເທົ່ານັ້ນ.
- ລຶກລັບ ຫຼື ຕ້ອງການຢາກຢູ່ຄົນດຽວຕະຫຼອດເວລາ.
- ເລີ່ມປະພຶດຕົນເປັນເດັກລົງກວ່າເກົ່າ ຫຼື ຄ້າຍຄືກັບເດັກນ້ອຍຫຼາຍຂຶ້ນ.
- ກາຍເປັນຄົນຮຸນແຮງ ແລະ ລ່ວງ.
- ພະຍາຍາມໜີອອກຈາກເຮືອນ.
- ຮູ້ສຶກໂສກເສົ້າຫງ່ວມເຫງົາຢູ່ຕະຫຼອດເວລາ ຫຼື ບໍ່ສະແດງຄວາມຮູ້ສຶກໃດໆເລີຍ.
- ມີບັນຫາໃນການນອນບໍ່ຫຼັບຍ້ອນຝັນຮ້າຍ, ຢ້ານຄວາມມືດ ແລະ ອາດຢ່ຽວໃສ່ບ່ອນ.
- ຢ້ານການຖືກເນື້ອຕ້ອງຕົວ ຫຼື ການເຮັດກິດຈະກຳທາງຮ່າງກາຍຕ່າງໆ.
ຖ້າທ່ານສົງໄສວ່າມີການລ່ວງລະເມີດທາງເພດ
ພະຍາຍາມທຸນທ່ຽງ, ກະຕຸ້ນໃຫ້ລູກຂອງທ່ານສະແດງໃຫ້ທ່ານຮູ້ວ່າແມ່ນຫຍັງເກີດຂຶ້ນ ແລະ ເຂົາຮູ້ ຫຍັງແດ່. ເພື່ອໃຫ້ໄດ້ຂ້ໍມູນຫຼາຍຂຶ້ນ ລອງແຕ່ງບົດເລື່ອງກັບລູກຂອງທ່ານ. ພະຍາຍາມເອົາໃຈໃສ່ໃນສິ່ງທີ່ເຂົາສະແດງອອກເນື່ອງຈາກວ່າ ເດັກອາດບໍ່ມີຄຳສັບ ຫຼື ສັນຍະລັກ ທີ່ຈະອະທິບາຍໃຫ້ທ່ານຮູ້ຢ່າງຈະແຈ້ງ. ໂດຍອາໄສນ້ໍາສຽງ ແລະ ສີໜ້າ ຈົ່ງສະແດງໃຫ້ລູກຂອງທ່ານຮູ້ວ່າທ່ານເຊື່ອເຂົາ ແລະ ຈະບໍ່ລົງໂທດເຂົາ.