Hesperian Health Guides
ຖ້າລູກຂອງທ່ານຖືກລ່ວງລະເມີດທາງເພດ
ຂໍ້ມູນສຸຂະພາບ > ການຊ່ວຍເຫຼືອເດັກນ້ອຍຫູໜອກ > ບົດທີ 13: ການປ້ອງກັນການລ່ວງລະເມີດທາງເພດເດັກ > ຖ້າລູກຂອງທ່ານຖືກລ່ວງລະເມີດທາງເພດ
- ເຊື່ອໃນສິ່ງທີ່ເດັກສະແດງ ຫຼື ສື່ສານກັບທ່ານ ມັນອາດເປັນສິ່ງຍາກທີ່ຈະເຊື່ອວ່າຄົນທີ່ທ່ານຮູ້ຈັກ ແລະ ໄວ້ໃຈຈະເປັນຄົນກະທຳສິ່ງນັ້ນ ແຕ່ຫາຍາກທີ່ເດັກນ້ອຍຈະແຕ່ງເລື່ອງເພື່ອຕົວະກ່ຽວກັບການຖືກລ່ວງລະເມີດທາງເພດ. ຜູ້ລ່ວງລະເມີດທາງເພດບາງຄົນອາດແມ່ນເພື່ອນມິດສະໜິດສະໜົມກັບພໍ່ແມ່ ຍ້ອນແນວນັ້ນ ຈຶ່ງສາມາດເຂົ້າຫາເດັກໄດ້ ແລະ ເຮັດໃຫ້ພໍ່ແມ່ບໍ່ລາຍງານກ່ຽວກັບການກະທຳດັ່ງກ່າວ.
- ຍ້ອງຍໍທີ່ເດັກບອກທ່ານ. ເດັກນ້ອຍຕ້ອງການຢາກຮູ້ວ່າສິ່ງທີ່ພວກເຂົາເຮັດໃນການສື່ສານກ່ຽວກັບການກະທຳດັ່ງກ່າວ ແມ່ນສິ່ງທີ່ຖືກຕ້ອງແລ້ວ.
- ຢ້ໍາຄືນໃຫ້ເດັກໝັ້ນໃຈວ່າ ການລ່ວງລະເມີດທາງເພດນັ້ນ ບໍ່ແມ່ນຄວາມຜິດຂອງເດັກ ແລະ ທ່ານກໍ່ບໍ່ໄດ້ໃຈຮ້າຍໃຫ້ເຂົາ. ພະຍາຍາມໝູນໃຊ້ຫຼາຍໆວິທີໃນການສື່ສານກ່ຽວກັບເລື່ອງນີ້ ເທົ່າທີ່ຈະເຮັດໄດ້.
- ຮັກສາຄວາມປອດໄພໃຫ້ເດັກ ພະຍາຍາມປ້ອງກັນບໍ່ໃຫ້ມີການພົບປະກັນຄັ້ງໃໝ່ລະຫວ່າງລູກຂອງທ່ານກັບຜູ້ກະທຳຜິດ ຖ້າຫາກເຮັດບໍ່ໄດ້ ກໍ່ຈ່ົງຢູ່ກັບເດັກ ຫຼື ໃຫ້ຜູ້ໃດຜູ້ໜຶ່ງທີ່ຮູ້ເລື່ອງດັ່ງກ່າວໃຫ້ຢູ່ກັບເດັກສະເໝີ ເມື່ອຜູ້ລ່ວງລະເມີດທາງເພດເດັກຢູ່ທີ່ນັ້ນ.
- ປິ່ນປົວບັນຫາທາງດ້ານຮ່າງກາຍທີ່ເກີດຈາກການລ່ວງລະເມີດທາງເພດ. ພະຍາຍາມໃຫ້ລູກຂອງທ່ານໄດ້ຮັບການກວດສອບຫາພະຍາດຕິດຕໍ່ທາງເພດສຳພັນ. ເຖິງແມ່ນວ່າເຂົາຈະບໍ່ມີອາການໃດໆ ກໍ່ຕາມ ພະຍາດຕິດຕໍ່ທາງເພດບາງຊະນິດ ບໍ່ສະແດງອາການ ຫຼື ຈະສະແດງອາການກໍ່ຕໍ່ເມື່ອເດັກໃຫຍ່ຂຶ້ນແດ່ແລ້ວ.
ຜູ້ເປັນພໍ່ແມ່ກໍ່ຕ້ອງການຄວາມຊ່ວຍເຫຼືອເຊັ່ນດຽວກັນ. ພໍ່ແມ່ອາດມີຫຼາຍໆຄວາມຮູ້ສຶກ ເຊັ່ນ: ຄວາມຮູ້ສຶກບໍ່ເຊື່ອ, ໃຈຮ້າຍ ແລະ ເສຍໃຈ ເມື່ອຮູ້ວ່າລູກຂອງຕົນຖືກລ່ວງລະເມີດທາງເພດ. ພໍ່ແມ່ອາດຕຳນິຕົນເອງ ຫຼື ຕຳນິເຊິ່ງກັນ ແລະ ກັນ ຕໍ່ສິ່ງທີ່ເກີດຂຶ້ນກັບລູກ. ພໍ່ແມ່ຄວນປຶກສາໂອ້ລົມກ່ຽວກັບຄວາມຮູ້ສຶກເຫຼົ່ານີ້ ກັບຜູ້ໃດຜູ້ໜຶ່ງ ທີ່ພວກເຂົາໄວ້ໃຈ ເຊິ່ງໃນນີ້ສາມາດຊ່ວຍໄດ້. ຈົ່ງມີຄວາມອົດທົນກັບຕົວເອງ. ມັນອາດກິນເວລາດົນໃນການປ່ຽນແປງຄວາມຮູ້ສຶກເຫຼົ່ານີ້.
ຄອບຄົວບໍ່ຄວນລະອາຍໃຈທີ່ມີລູກຖືກລ່ວງລະເມີດທາງເພດ ການລ່ວງລະເມີດທາງເພດແມ່ນອາຊະຍາກຳ, ກໍ່ເໝືອນກັບການລັກຊັບຂອງຄົນອື່ນ ເຊິ່ງບໍ່ໄດ້ເປັນຕົ້ນເຫດມາຈາກຄອບຄົວເລີຍ.