Hesperian Health Guides
ການໝູນໃຊ້ພາສາເວົ້າ
ຂໍ້ມູນສຸຂະພາບ > ການຊ່ວຍເຫຼືອເດັກນ້ອຍຫູໜອກ > ບົດທີ 7: ການເລືອກເຟັ້ນ ແລະ ການຮຽນຮູ້ພາສາ > ການໝູນໃຊ້ພາສາເວົ້າ
ການຮຽນພາສາເວົ້າສຳລັບເດັກທີ່ບໍ່ໄດ້ຍິນດີອາດຕ້ອງການຄື:
- ຟັງໂດຍໝູນໃຊ້ຄວາມສາມາດໄດ້ຍິນທີ່ຍັງມີຢູ່ເພື່ອໃຫ້ເຂົ້າໃຈຄຳເວົ້າ ແລະ ການໝູນໃຊ້ເຄື່ອງຊ່ວຍຟັງ.
- ສັງເກດສົບຂອງຜູ້ເວົ້າ ແລະ ເດົາວ່າ ພວກເຂົາກຳລັງເວົ້າຫຍັງ ໂດຍຜ່ານການອ່ານຮີມສົບ.
- ຝຶກຊ້ອມການອອກສຽງເປັນຄຳເວົ້າ ເພື່ອໃຫ້ຄົນອື່ນເຂົ້າໃຈເດັກ.
ຈົ່ງຈື່ໄວ້ວ່າ ຖ້າທ່ານໃຊ້ພາສາເວົ້າກັບເດັກ, ທ່ານ ແລະ ສະມາຊິກໃນຄອບຄົວຈະຕ້ອງເວົ້າກັບເດັກຜູ້ນັ້ນໃຫ້ຫຼາຍເທົ່າທີ່ຈະຫຼາຍໄດ້.
ຈົ່ງມີຄວາມອົດທົນ ເດັກຫູໜວກຈະຮຽນຮູ້ພາສາໄດ້ຊ້າກວ່າ ເດັກທີ່ສາມາດໄດ້ຍິນປົກກະຕິ. ທ່ານຕ້ອງເຮັດໃຫ້ເດັກໄດ້ໝູນໃຊ້ຄຳເວົ້າ. ເຖິງແມ່ນວ່າ ທ່ານສາມາດເຮັດສິ່ງໃດສິ່ງໜຶ່ງໃຫ້ເດັກໄດ້ ໂດຍທີ່ເດັກບໍ່ເວົ້າກໍ່ໄດ້ ຫຼື ລໍຖ້າຈົນເດັກຮ້ອງຖາມເສຍກ່ອນ.
ເດັກຫູໜວກອາດມີລັກສະນະການເວົ້າທີ່ແຕກຕ່າງອອກໄປ, ເດັກນ້ອຍຫູໜວກເກືອບທັງໝົດ ເວົ້າແຕກຕ່າງຈາກເດັກນ້ອຍ ຜູ້ທີ່ໄດ້ຍິນປົກກະຕິ. ທ່ານອາດຮູ້ສິກເຂີນອາຍ ເມື່ອໄດ້ຍິນລັກສະນະສຽງເວົ້າຂອງເດັກຄັ້ງທຳອິດ. ແຕ່ເມື່ອທ່ານລຶ້ງເຄີຍແລ້ວ ທ່ານກໍ່ຄວນອະທິບາຍໃຫ້ຄົນອື່ນເຂົ້າໃຈນຳ.
ແຕ່ລະຂົງເຂດ ແຕ່ລະປະເທດ ມີຄວາມເຂົ້າໃຈກ່ຽວກັບການຮຽນຮູ້ ເພື່ອສື່ສານຂອງເດັກຫູໜວກແຕກຕ່າງກັນອອກໄປ. ໂຮງຮຽນອະນຸບານໃນພາກໃຕ້ຂອງປະເທດອິນເດຍ ພະຍາຍາມສອນໃຫ້ເດັກທີ່ບໍ່ສາມາດໄດ້ຍິນນີ້ໃຫ້ເວົ້າ, ອ່ານ, ຂຽນ ແລະ ຟັງ.
ພວກເຂົາກະກຽມໃຫ້ເດັກຫູໜວກ ສາມາດເຂົ້າຮຽນໃນໂຮງຮຽນທົ່ວໄປໄດ້ ເມື່ອເຂົາເຈົ້າອາຍຸ 5 ປີ.ພວກເຂົາແນະນຳໃຫ້ເດັກນ້ອຍຫູໜວກ ໃສ່ເຄື່ອງຊ່ວຍຟັງ ທີ່ມີຖົງແນບຕິດກັບໂຕ, ເພາະໂຮງຮຽນບໍ່ຕ້ອງການໃຫ້ເດັກຮູ້ສຶກອາຍວ່າຕົນຫູໜວກ. ເຄື່ອງຊ່ວຍຟັງນອກຈາກຈະຊ່ວຍໃຫ້ເດັກໄດ້ຍິນສຽງດັງຂຶ້ນແລ້ວ ຍັງຊ່ວຍໃຫ້ຄົນອື່ນໆເຫັນ ແລະ ຍອມຮັບວ່າ ເດັກເຫຼົ່ານີ້ແມ່ນມີຄວາມແຕກຕ່າງ.
ຄຸນປະໂຫຍດຈາກການຮຽນພາສາເວົ້າ
- ຖ້າເດັກສາມາດສື່ສານກັບຄົນອື່ນໃນສັງຄົມ ຄົນອື່ນໆອີກຫຼາຍຄົນກໍ່ຈະສາມາດເຂົ້າໃຈເຂົາ.
- ເດັກຫູໜວກທີ່ສາມາດໝູນໃຊ້ພາສາເວົ້າ ແມ່ນພ້ອມສຳລັບການເຂົ້າຮຽນໃນໂຮງຮຽນທີ່ບໍ່ໄດ້ໃຊ້ພາສາມື.
- ເດັກທີ່ໃຊ້ພາສາເວົ້າຈະສາມາດອ່ານງ່າຍຂຶ້ນ ເພາະພາສາທີ່ເຂົາເວົ້າ ແລະ ຂຽນແມ່ນຄ້າຍຄືກັນ.
ຂ້ໍຫຍຸ້ງຍາກສຳລັບການໝູນໃຊ້ພາສາເວົ້າ
- ການສື່ສານໂດຍຜ່ານພາສາເວົ້ານີ້ ສາມາດໃຊ້ໄດ້ແຕ່ສະເພາະເດັກທີ່ຍັງມີຄວາມສາມາດໃນການໄດ້ຍິນຢູ່ສ່ວນໜຶ່ງ (ພຽງພໍທີ່ຈະໄດ້ຍິນ ແລະ ຈຳແນກຄວາມແຕກຕ່າງຂອງບັນດາຄຳສັບ) ຫຼື ສຳລັບເດັກທີ່ຫູເລີ່ມໜວກ ຫຼັງຈາກທີ່ເຂົາໄດ້ຮຽນການປາກເວົ້າແລ້ວ.
- ເດັກອາດມີຄວາມສັບສົນໃນການອ່ານຮີມສົບເພາະມີຫຼາຍສຽງທີ່ເບິ່ງຄ້າຍຄືກັນ ເມື່ອເຮົາສັງ ເກດສົບ ຫຼື ສຽງທີ່ບໍ່ສາມາດສັງເກດໄດ້ຈາກສົບ ຍົກຕົວຢ່າງ: ຄຳສັບໃນພາສາລາວ “ປີໃໝ່” ແລະ “ມີໃບ” ທັງໝົດແມ່ນເບິ່ງຄືກັນ. ທ່ານສາມາດສັງເກດເບິ່ງເອງໄດ້ໂດຍຜ່ານແວ່ນ.
- ເດັກທີ່ມີບັນຫາໃນການໄດ້ຍິນ ຈະບໍ່ສາມາດອອກສຽງໄດ້ຢ່າງຈະແຈ້ງ ເພາະເຂົາເອງກໍ່ບໍ່ສາ ມາດໄດ້ຍິນສຽງຂອງເຂົາ ແລະ ຄົນອື່ນໆອາດຈະບໍ່ເຂົ້າໃຈສຽງເວົ້າຂອງເຂົາ ຍົກເວັ້ນ ສະມາຊິກໃນຄອບຄົວເທົ່ານັ້ນ.
- ເດັກອາຍຸນ້ອຍໆ ອາດມີບັນຫາໃນການນັ່ງຮຽນພາສາໃນໄລຍະເວລາດົນໆ.
- ເມື່ອເດັກຕັ້ງໃຈແຕ່ຮຽນຮູ້ ການເວົ້າ ແລະ ຮຽນແຕ່ເບິ່ງວ່າຄົນອື່ນເວົ້າຫຍັງ. ຈະເຮັດໃຫ້ເດັກຂາດການຮຽນຮູ້ກ່ຽວກັບໂລກພາຍນອກ.