Hesperian Health Guides
ການອັກເສບກະດູກອ່າງຊາມຍ້ອນການຕິດເຊື້ອ
ຂໍ້ມູນສຸຂະພາບ > ປຶ້ມຢູ່ໄກແພດສະບັບປັບປຸງໃໝ່ > ພະຍາດຕິດຕໍ່ທາງເພດສຳພັນ > ການອັກເສບກະດູກອ່າງຊາມຍ້ອນການຕິດເຊື້ອ
ການອັກເສບກະດູກອ່າງຊາມຍ້ອນການຕິດເຊື້ອ ຫຼື PID ແມ່ນຊື່ເອີ້ນຂອງການຕິດເຊື້ອສ່ວນຕ່າງໆ ຂອງລະບົບ ສືບພັນທີ່ຢູ່ພາກສ່ວນລຸ່ມຂອງຜູ້ຍິງ. ມັກເອີ້ນກັນວ່າ “ການຕິດເຊື້ອຂອງກະດູກອ່າງຊາມ”
ການຕິດເຊື້ອຂອງກະດູກອ່າງຊາມສາມາດເກີດຂຶ້ນໄດ້ຖ້າທ່ານມີການຕິດເຊື້ອທາງເພດສຳພັນທີ່ບໍ່ໄດ້ຮັບການປິ່ນປົວ ຮັກສາ, ໂດຍສະເພາະແມ່ນໜອງໃນແທ້ ຫຼື ໜອງໃນທຽມ. ແຕ່ PID ທຸກອັນເກີດມາຈາກການຕິດເຊື້ອທາງເພດສຳພັນ ສາເຫດອື່ນໆຂອງການເກີດ PID ລວມມີການຕິດເຊື້ອຫຼັງເກີດລູກ, ລຸລູກທຳມະຊາດ ແລະ ການລຸລູກແບບບັງຄັບ, ຫຼື ພົບເຫັນໜ້ອຍຈາກການໃສ່ຫວງ (IUD) ໝາຍເຖິງໃສ່ເຄື່ອງມືເຂົ້າໄປໃນມົດລູກໂດຍບໍ່ໄດ້ປະຕິບັດຕາມຂັ້ນຕອນການ ອະເຊື້ອ.
ເຊື້ອພະຍາດທີ່ເປັນສາເຫດການເກີດການຕິດເຊື້ອຂອງກະດູກອ່າງຊາມແມ່ນມາຈາກຊ່ອງຄອດໂດຍຜ່ານປາກມົດລູກ ແລະເຂົ້າໄປໃນມົດລູກ, ທໍ່ສົ່ງໄຂ່ ແລະຮວຍໄຂ່. ຖ້າວ່າການຕິດເຊື້ອນີ້ບໍ່ໄດ້ຮັບການປິ່ນປົວໃຫ້ທັນເວລາ, ມັນສາມາດເປັນສາເຫດເຮັດໃຫ້ເກີດການເຈັບປວດຊໍ້າເຮື້ອ, ມີລູກຍາກ, ເຈັບເປັນຮຸນແຮງ ຫຼືເສຍຊີວິດໄດ້.
ອາການຕ່າງໆ (ທ່ານອາດຈະມີໜຶ່ງ ຫຼືຫຼາຍອາການຂອງບັນດາອາການສະແດງເຫຼົ່ານີ້)
- ເຈັບທ້ອງພາກສ່ວນລຸ່ມ (ອ່າງຊາມ) ອາດເຈັບໜ້ອຍໜຶ່ງ ຫຼື ຮຸນແຮງ
- ເຈັບ ຫຼື ມີເລືອດອອກໃນລະຫວ່າງມີເພດສຳພັນ
- ທ້ອງຕຶງເວລາກົດທ້ອງພາກສ່ວນລຸ່ມ
- ໄຂ້
- ຮູ້ສຶກບໍ່ສະບາຍ ແລະ ເມື່ອຍຫຼາຍ
- ເລືອດໄຫຼຜິດປົກກະຕິ ຫຼື ລົງຂາວມີກິ່ນເໝັນອອກມາຈາກຊ່ອງຄອດ
ການປິ່ນປົວ
ຖ້າຫາກວ່າທ່ານບໍ່ສະບາຍຫຼາຍພ້ອມທັງມີໄຂ້ສູງ ຫຼື ຮາກ, ຫຼື ຖ້າວ່າທ່ານຖືພາ ຫຼື ຫາກໍ່ລຸລູກ ຫຼື ເກີດລູກມາຫວ່າງມໍ່ໆນີ້, ໃຫ້ທ່ານໄປສຸກສາລາ ຫຼືໂຮງໝໍທັນທີ. ທ່ານຈຳເປັນຈະຕ້ອງໄດ້ຮັບການປິ່ນປົວດ້ວຍຢາສັກທາງເສັ້ນເລືອດ.
ຖ້າວ່າອາການສະແດງກຳລັງເລີ່ມເປັນ ແລະ ຍັງບໍ່ທັນຮ້າຍແຮງ, ໃຫ້ປິ່ນປົວດ້ວຍການໃຫ້ກິນຢາເອົາ. ການຕິດ ເຊື້ອນີ້ປົກກະຕິມີສາເຫດເກີດຈາກເຊື້ອພະຍາດທີ່ປະສົມປະສານກັນ, ສະນັ້ນຈຳເປັນຢ່າງໜ້ອຍ ຕ້ອງມີຢາ 2 ຊະນິດ. ເບິ່ງການປິ່ນປົວດ້ວຍຢາແບບປະສົມປະສານເພື່ອປິ່ນປົວຮັກສາການຕິດເຊື້ອຂອງກະດູກອ່າງຊາມ. ເລີ່ມປິ່ນປົວຮັກສາທັນທີ. ຖ້າທ່ານບໍ່ຮູ້ສຶກມີອາການ ດີຂຶ້ນຫຼັງຈາກປິ່ນປົວໄປ 2 ວັນ, ໃຫ້ຂໍຄວາມຊ່ວຍເຫຼືອຈາກແພດຕື່ມ.
ຖ້າທ່ານມີ PID , ຄູ່ນອນ ຫຼື ຄູ່ຮ່ວມເພດຂອງທ່ານຈຳເປັນຈະຕ້ອງໄດ້ຮັບການກວດ ແລະ ປິ່ນປົວການຕິດ ເຊື້ອຄືກັນ.